ভাৰত-বাংলা সীমান্তত অকাল মৃত্যুক সাৱটিলে অসম আৰক্ষীৰ জোৱান

যোৱা নিশা মানকাৰচৰৰ কুকুৰমাৰাৰ ভাৰত-বাংলাদেশ সীমান্তত চোৰাং গৰু সৰবৰাহকাৰীৰ বিৰুদ্ধে অভিযান চলাবলৈ গৈছিল ঝালোৰচৰস্থিত 26 আই আৰ বি এনৰ এটা দল ৷ কিন্তু গৰু সৰবৰাহকাৰীক খেদিবলৈ যাওতেই সীমান্ত অঞ্চলত থকা এটা খালত সোমাই পৰে কনিষ্টবল ৰবেন দাস ৷ সাঁতুৰিবলৈ অপ্ৰাণ চেষ্টা কৰিও খালটোৰ গভীৰতা অধিক হোৱাৰ বাবে বাচিব নোৱাৰিলে কনিষ্টবল গৰাকী ৷

পাঠশালা, 18 অক্টোবৰ : মানকাচৰৰ ভাৰত বাংলাদেশ সীমান্তত সংঘটিত হৈছে এক হৃদয় বিদাৰক ঘটনা ৷ চোৰাং গৰু সৰবৰাহকাৰীৰ বিৰুদ্ধে অভিযান চলাবলৈ গৈ মৃত্যুক সাৱটি ল’লে অসম আৰক্ষীৰ এজন জোৱানে ৷ যোৱা নিশা মানকাৰচৰৰ কুকুৰমাৰাৰ ভাৰত-বাংলাদেশ সীমান্তত চোৰাং গৰু সৰবৰাহকাৰীৰ বিৰুদ্ধে অভিযান চলাবলৈ গৈছিল ঝালোৰচৰস্থিত 26 আই আৰ বি এনৰ এটা দল ৷

কিন্তু গৰু সৰবৰাহকাৰীক খেদিবলৈ যাওতেই সীমান্ত অঞ্চলত থকা এটা খালত সোমাই পৰে কনিষ্টবল ৰবেন দাস ৷ সাঁতুৰিবলৈ অপ্ৰাণ চেষ্টা কৰিও খালটোৰ গভীৰতা অধিক হোৱাৰ বাবে বাচিব নোৱাৰিলে কনিষ্টবল গৰাকী ৷ আনকি সহযোগগী সকলেও চেষ্টা কৰিব উদ্ধাৰ কৰিব নোৱাৰিলে ৰবেন দাসক ৷

পাচত নিশাই এছ ডি আৰ এফ বাহিনী ঘটনাস্থলীত উপস্থিত হৈ উদ্ধাৰ কৰে ৰবেন দাসৰ মৃতদেহ ৷ দেওবাৰে পুৱা কনিষ্টবল গৰাকীৰ মৃতদেহ মৰণোত্তৰ পৰীক্ষাৰ বাবে ধুবুৰী অসামৰিক চিকিৎসালয়লৈ প্ৰেৰণ কৰা হয় ৷ ঘটনাস্থলীৰ পৰা আৰক্ষীয়ে উদ্ধাৰ কৰে দুটা চোৰাং গৰু ৷

আনহাতে পুৱালৈকে পৰিয়ালৰ লোকে পোৱা নাছিল ৰবেন দাসৰ মৃত্যুৰ খবৰ ৷ পুৱাহে তেওঁৰ ভাতৃক লগৰীয়াই ফোনযোগে জনায় এই খবৰ ৷ অসম আৰক্ষীৰ সঞ্চালক প্ৰধান ভাস্কৰজ্যোতি মহন্তইও ৰবেন দাসৰ পৰিয়াললৈ ফোন কৰি মৃত্যুৰ খবৰ জনোৱাৰ লগতে ৰবেন দাসক শ্বহীদ ঘোষণা কৰাৰ কথা সদৰী কৰে ৷

এই খবৰ লাভ কৰাৰ লগে লগে সৰুক্ষেত্ৰীৰ হাঠিনাপুৰৰ ৰবেন দাসৰ ঘৰত হুৱাদুৱা লাগে ৷ 2018 চনত চাকৰিত যোগ দিছিল ৰবেন দাসে ৷ স্থানীয় ৰাইজে অন্ত্যেষ্টিক্ৰিয়াৰ বাবে যাৱতীয় সকলো ব্যৱস্থা সমাপন কৰিছে ৷ সামৰিক মৰ্যাদাৰে সম্পন্ন কৰা হ’ব ৰবেন দাসৰ অন্ত্যেষ্টিক্ৰিয়া ৷ সমগ্ৰ অঞ্চলটোতে কনিষ্টবলজনৰ মৃত্যুৱে সোকৰ ছাঁ পেলাইছে ৷

লগতে পঢ়ক :আছুৰ বাবে নীলকণ্ঠৰ দৰে কাম কৰি যাব সমুজ্জল ভট্টাচাৰ্যই