পৰিয়ালে নিজ ধনৰে নিৰ্মাণ কৰিলে ছহিদৰ প্ৰতিমূৰ্তি

ছহিদ মদন বৰ্মনক সমাধিস্থ কৰা হৈছিল সাদেৰী তথা বৰ্তমানৰ ভূটান ৰাষ্ট্ৰীয় ঘাইপথৰ সমীপত ৷ কিন্তু যথাস্থানত এজোপা আম গছৰ বাহিৰে বৰ্তমানলৈকে নাই ছহিদ গৰাকীৰ কোনো স্মৃতি চিহ্ন ৷

পাঠশালা, ২৫ চেপ্তেম্বৰঃ 42ৰ গণ আন্দোলনত 25 চেপ্তেম্বৰত বজালীৰ দুই সন্তান মদন বৰ্মন আৰু ৰাউতা ৰাম কোঁচে নিজৰ প্ৰাণ আহুতি দি ছহিদ হোৱাৰ গৌৰৱ অৰ্জন কৰিছিল ৷ ছহিদ মদন বৰ্মনক সমাধিস্থ কৰা হৈছিল সাদেৰী তথা বৰ্তমানৰ ভূটান ৰাষ্ট্ৰীয় ঘাইপথৰ সমীপত ৷ কিন্তু যথাস্থানত এজোপা আম গছৰ বাহিৰে বৰ্তমানলৈকে নাই ছহিদ গৰাকীৰ কোনো স্মৃতি চিহ্ন ৷ বিশাল পুখুৰী এটাক কেন্দ্ৰ কৰি সেইস্থানক ছহিদ মদন বৰ্মন মীন মহল নামেৰে নামাকৰণ কৰা হৈছিল যদিও দীৰ্ঘদিন তলা ওলমি আছে মীন মহলটোত ৷ দেশৰ বাবে প্ৰাণ ত্যাগ কৰা বীৰ ছহিদৰ প্ৰতি সন্মান প্ৰৰ্দশনত সকলোৰে অনীহা ৷

সেয়েহে চৰকাৰৰ এই অৱহেলাৰ বাবে ছহিদ গৰাকীৰ পৰিয়ালৰ লোকে 25 চেপ্তেম্বৰত অৰ্থাৎ আজিৰ দিনটোতে নিজৰ টকাৰে নিৰ্মাণ কৰি উদ্বোধন কৰিছে ছহিদ গৰাকীৰ ছহিদ বেদী সহ এটা প্ৰতিমূৰ্তি ৷ ছহিদ গৰাকীৰ ভাগিনীয়েক তথা ছহিদ ৰাউতা মদন উচ্ছতৰ মাধ্যমিক বিদ্যালয়ৰ শিক্ষয়িত্ৰী অৰ্পনা তালুকদাৰ, সঞ্জয় তালুকদাৰ আৰু যুগল তালুকদাৰ এই তিনি গৰাকী লগ হৈ প্ৰায় আঢ়ৈ লাখ টকাৰে নিৰ্মাণ কৰি উলিয়াইছে ছহিদ বেদী তথা প্ৰতিমূৰ্তি ৷