জনীয়া,7 আগষ্টঃএখন টুলুঙা নাওঁৱেই এতিয়া একমাত্ৰ ভৰষা কলগাছিয়াৰ গুনিয়ালগুৰিবাসীৰ বাবে ৷ কাৰণ অঞ্চলটোত নাই যাতায়তৰ কোনো সু-ব্যৱস্থা ৷ বৰপেটা আৰু বঙাইগাঁও জিলাৰ সীমামূৰীয়া অঞ্চল গুনিয়ালগুৰি-কোকিলা সংযোগী মৰা মানাহ নদীৰ ওপৰত দলং নিৰ্মাণকাৰ্য সম্পূৰ্ণ নকৰাৰ ফলত এতিয়া জীয়াতু ভুগিছে সাধাৰণ ৰাইজে ৷ শীঘ্ৰে দলং নিৰ্মাণ নকৰাৰ ফলত সদায় পকেটৰ ধন খৰচ কৰি মৰণত শৰণ দি এখন টুলুঙা নাৱেৰে যাতায়ত কৰিব লগা হৈছে কেইবাখনো স্কুল কলেজৰ শ শ ছাত্ৰ-ছাত্ৰীৰ লগতে অঞ্চলটোৰ ৰাইজে ৷
উল্লেখযোগ্য যে,২০১৭-১৮ বৰ্ষত মুখ্যমন্ত্ৰীৰ ১ হাজাৰ পকী দলং নিৰ্মাণ আঁচনিৰ দ্বাৰা আবন্টিত ধনেৰে উত্তৰ অভয়াপুৰীৰ বিধায়ক আব্দুল হাই নাগৰীয়ে যোৱা ২৭মে' তাৰিখত স্থাপন কৰিছিল দলং নিৰ্মাণৰ আধাৰশিলা। কিন্তু জামিৰুল হক খন্দকাৰ নামৰ ঠিকাদাৰজনে লেহেমীয়া গতিৰে কাম কৰি থকাত এতিয়াও অৰ্ধনিৰ্মিত অৱস্থাত আছে দলংখন। ইফালে উক্ত স্থানত কোনো বিকল্প ফুটব্ৰিজ নিৰ্মাণ নকৰাৰ ফলত এইদৰে দুৰ্ভোগ ভুগিব লগা হৈছে অঞ্চলটোৰ ৰাইজে। ঠিকাদাৰৰ চৰম গাফিলতিৰ বাবে দলঙখনৰ নিৰ্মাণকাৰ্য সম্পূৰ্ণ নোহোৱাত স্থানীয় ৰাইজ ক্ষুব্ধ হৈ ঠিকাদাৰজনৰ অনুজ্ঞাপত্ৰ বাতিলৰ দাবী তুলিছে ।
