ফণীধৰ তালুকদাৰ বিজেপি গমনক লৈ হাফিজ ৰফিকুল ইছলামৰ প্ৰতিক্ৰিয়া

আয়ৰ সৈতে অসামঞ্জস্য সম্পত্তি গঢ়াৰ অভিযোগত 24 আগষ্টত অসম অসামৰিক সেৱাৰ (ACS) বিষয়া চাইবুৰ ৰহমানক মুখ্যমন্ত্ৰীৰ বিশেষ তদাৰকী কোষে চাইবুৰ ৰহমানক গ্ৰেপ্তাৰ কৰিছিল । চাইবুৰ ৰহমানৰ বিশাল সম্পত্তি সন্দৰ্ভত সম্প্ৰতি অভিযান অব্যাহত ৰাখিছে মুখ্যমন্ত্ৰীৰ বিশেষ তদাৰকী কোষে ।

জনিয়া, 29 আগষ্ট :সৰুক্ষেত্ৰী সমষ্টিৰ এ আই ইউ ডি এফৰ প্ৰাৰ্থী মিনাক্ষী ৰহমানৰ স্বামী চাইবুৰ ৰহমানৰ বিৰুদ্ধে মুখ্যমন্ত্ৰীৰ বিশেষ তদাৰকী কোষৰ তদন্ত চলি থকাৰ সময়তে ভৱানীপুৰ সমষ্টিৰ বিধায়ক তথা ধন কুবেৰ ফণীধৰ তালুকদাৰে এ আই ইউ ডি এফ (AIUDF) ত্যাগ কৰি বিজেপিলৈ গমন কৰাৰ বাতৰিয়ে এতিয়া সৃষ্টি কৰিছে ৰহস্যৰ । প্ৰশ্ন উত্থাপন হৈছে, মুখ্যমন্ত্ৰীৰ বিশেষ তদাৰকী কোষৰ তদন্তৰ ভয়তে বিজেপিলৈ পলাব খুজিছে নেকি ফণীধৰ তালুকদাৰ ?

জনীয়াৰ বিধায়ক ড৹ হাফিজ ৰফিকুল ইছলামে এই সন্দৰ্ভত প্ৰতিক্ৰিয়া ব্যক্ত কৰি কয় যে, বিজেপি হ’ল "ৱাচিং মেচিন" ৷ দুৰ্নীতিগ্ৰস্তসকলে বিজেপিত যোৱাৰ পিছত গাখীৰত ধুই পৰিস্কাৰ হৈ পৰে । হাজাৰ দুৰ্নীতি কৰিলেও বিজেপিত যোৱাৰ পিছত তেওঁৰ কোনো দুৰ্নীতি নাথাকে । জনীয়াৰ বিধায়কগৰাকীয়ে প্ৰকৃততে এই মন্তব্যৰ দ্বাৰা ফণীধৰ তালুকদাৰৰ বিষয়ে আওপকীয়াকৈ বুজাব খুজিছে ৷

বিধায়কগৰাকীয়ে সাংবাদিকৰ সাক্ষাৎকাৰত কয় যে, বানমুক্ত অসম গঢ়াত ব্যৰ্থ হৈছে অসম চৰকাৰ, ভূটানৰ পানীয়ে বিস্তৰ ক্ষতি কৰিছে নামনি অসমত । চৰকাৰে বানাক্ৰান্তক সাহাৰ্য প্ৰদান কৰিব লাগে । তেওঁ লগতে কয় যে, উপ-নিৰ্বাচনত মহাজোঁটৰ প্ৰাসংগিকতা আছে ৷ বিজেপিক পৰাজিত কৰিবলৈ সকলোৱে ঐক্যৱদ্ধ হৈ থকাৰ পোষকতা কৰে ড৹ ইছলামে ।

তেওঁ লগতে কয় যে, "সোৱনশিৰি নদীবান্ধৰ বিৰোধীতা কৰিছিলো, নিৰ্মাণ সম্পূৰ্ণ নৌহওঁতেই ভাঙিবলৈ আৰম্ভ কৰিছে নদীবান্ধ প্ৰকল্প । বৃহৎ নদীবান্ধে ক্ষতি কৰিব ৰাইজক । এই সন্দৰ্ভত নজৰ দিব লাগে চৰকাৰে ৷"

লগতে পঢ়ক :ACS বিষয়া চাইবুৰ ৰহমানৰ কয়াকুছিৰ বাসগৃহত তদাৰকী কোষৰ অভিযান