কলগাছিয়াত বেকী নৈৰ খহনীয়াই ধাৰণ কৰিছে বিধ্বংসী ৰূপ

বেকী নদীৰ বাঢ়নি পানীয়ে বিধ্বংসী ৰূপ ধাৰণ কৰিছে কলগাছিয়া ৰাজহ চক্ৰৰ অন্তৰ্গত বেছিমাৰীত ৷ শীঘ্ৰেই বিহীত ব্যৱস্থা গ্ৰহণ নকৰিলে পৰিস্থিতি অধিক অৱনতি হোৱা আশংকা প্ৰকট স্থানীয় লোকৰ ৷

জনীয়া, 10 আগষ্ট: কলগাছিয়া ৰাজহ চক্ৰৰ অন্তৰ্গত বেছিমাৰীত বেকী নদীৰ বাঢ়নি পানীয়ে ধাৰণ কৰিছে বিধ্বংসী ৰূপ ৷ ভাবুকি কঢ়িয়াই আনিছ বৃহত্তৰ অঞ্চলটোৰ কেইবাখনে গাঁৱলৈ ৷ ইতিমধ্যে জুলাই মাহত হৈ যোৱা বেকী নদীৰ প্ৰলয়ংকৰী বানপানীত কলগাছিয়াৰ অন্তৰ্গত লাংগাচাৰ কেইবাটাও পি এম জি পথ ছিগি নিয়ে ৷ যাৰ ফলত দেওবাৰে নিশা ফেনে ফোটোকাৰে বাঢ়ি অহা বেকী নদীৰ পানী সোমাই ভয়ংকৰ ৰূপ ধাৰণ কৰিছে ভূঞাৰ দলঙৰ নিকটৱৰ্তী স্থানত ৷

ইতিমধ্যে শংকিত গাঁওবাসীয়ে খহনীয়া প্ৰতিৰোধৰ চেষ্টা অব্যাহত ৰাখিছে যদিও অতি শীঘ্ৰেই যদি পৰ্যাপ্ত ব্যৱস্থা গ্ৰহণ কৰা নহয় তেন্তে, অঞ্চলটোৰ প্ৰায় 50 খন গাঁও ক্ষতিগ্ৰস্ত হোৱাৰ সম্ভাৱণা প্ৰকট হৈ পৰিছে ৷ শংকিত ৰাইজে অতি শীঘ্ৰেই ক্ৰমান্বয়ে ভয়ংকৰ ৰূপ ধাৰণ কৰা অঞ্চলটোৰ সমস্যা সমাধানৰ বাবে বিহীত ব্যৱস্থা গ্ৰহণ কৰিবলৈ অনুৰোধ জনাইছে প্ৰশাসনক ৷

লগতে পঢ়ক:বিগত এমাহে পানীৰ তলত ৰঙিয়াৰ খন্দিকৰবাসীঃ সাক্ষাৎ নাই জন প্ৰতিনিধিৰ