বৰপেটা, ১৩ আগষ্টঃ হেম বৰুৱাৰ হৃদয়স্পৰ্শী কবিতা 'মমতাৰ চিঠি' এইবাৰ বন্দী হ'ব চেলুলয়ডত ৷ অসমীয়া জীৱনৰ আঁহে আঁহে,কোঁহে কোঁহে শিহৰিত হৈ থকা 'মমতাৰ চিঠি'ক চেলুলয়ডত বন্দী কৰিবলৈ আগবাঢ়ি আহিছে বৰপেটাৰ অভিনেতা,পৰিচালক নিৰ্মল দাস ৷ 'মমতাৰ চিঠি'ক চিত্ৰৰূপ দিয়াৰ বাবে কাম আৰম্ভ কৰিছে পৰিচালক নিৰ্মল দাসে ৷ বিগত প্ৰায় 15 বছৰ ধৰি চলোৱা বিভিন্ন পৰীক্ষা নিৰীক্ষাৰ অন্তত মঙলবাৰে ছবিখনৰ নিৰ্মাণৰ কাম আৰম্ভ কৰাৰ কথা আনুষ্ঠানিকভাৱে ঘোষণা কৰে পৰিচালকগৰাকীয়ে ৷
বৰপেটা প্ৰেছক্লাৱত এখন সংবাদমেল সম্বোধন কৰি পৰিচালক নিৰ্মল দাসে বৰপেটাৰ মুখা নামৰ অপেছাদাৰী নাট্যদলটোৰ বেনাৰত ছবিখন নিৰ্মাণ হ'ব বুলি প্ৰকাশ কৰে ৷ কবিতাটোত বৰ্ণিত ভোগদৈৰ পাৰৰ লগতে বৰপেটাৰ ওচৰ পাজৰৰ জিলা সমুহতে মূলতঃ চিত্ৰগ্ৰহণ হ'ব বুলি পৰিচালক গৰাকীয়ে জানিবলৈ দিয়ে ৷ কবিতাক আধাৰ কৰি এইখনেই হ'ব অসমীয়া ভাষাত নিৰ্মিত প্ৰথমখন চিনেমা হ'ব বুলিও তেওঁ প্ৰকাশ কৰে ৷ ইয়াৰ পূৰ্বে নিৰ্মল দাসৰ ৰচনা আৰু পৰিচালনাৰে শৰাইঘাট থিয়েটাৰে একেৰাহে দুবছৰ ধৰি মঞ্চস্থ কৰিছিল 'মমতাৰ চিঠি' নামৰ নাটখন ৷ গভীৰ প্ৰেম আৰু অ-সম যন্ত্ৰণাৰ কৰুণগাঠা মমতাৰ চিঠিৰ নিৰ্মাণকাৰ্য অগতানুগতিক হ'ব বুলি প্ৰকাশ কৰে পৰিচালক নিৰ্মল দাসে ৷