কলগাছিয়াত চোৰৰ চাফাই অভিযান

কলগাছিয়াত সংঘটিত লুটপাতৰ ঘটনা ৷ শাকিল কম্পিউটাৰ নামৰ এখন বিপণীৰ স্বত্বাধিকাৰী জেহেৰুল ইছলামৰ ঘৰত চোৰে চলাই চাফাই অভিযান ৷ সম্প্ৰতি চিকিৎসাধীন পৰিয়ালটোৰ চাৰিওগৰাকী সদস্য ৷

জনীয়া,17 নৱেম্বৰ:এটাৰ পিছত এটাকৈ চুৰি-ডকাইতিৰ দৰে কাণ্ড সংঘটিত হৈ আহিছে বৰপেটাৰ কলগাছিয়াত । কিন্তু তৎসত্বেও কোনো বিহিত ব্যৱস্থা গ্ৰহণ নকৰাৰ অভিযোগ উত্থাপিত হৈছে কলগাছিয়া আৰক্ষীৰ বিৰুদ্ধে । শেহতীয়াকৈ কলগাছিয়া বজাৰস্থিত শাকিল কম্পিউটাৰ নামৰ এখন বিপণীৰ স্বত্বাধিকাৰী জেহেৰুল ইছলাম নামৰ লোকগৰাকীৰ ঘৰত সংঘটিত হৈছে লুটপাতৰ ঘটনা ৷

লুটপাত

ঘটনাৰ বিৱৰণী অনুসৰি, পৰিয়ালটোৱে নিশাৰ আহাৰ গ্ৰহণ কৰি শুই যোৱাৰ পিছতে এই ঘটনা সংঘটিত হয় ৷ চোৰে পৰিয়ালটোৰ পৰা সোণৰ আ-অলংকাৰ, নগদ ধন, লেপটপৰ লগতে কম্পিউটাৰৰ কিছু সা-সামগ্ৰী আৰু বিপণীখনৰ চাবি পৰ্যন্ত লুটি নিয়ে ৷ মঙলবাৰে পুৱা পৰিয়ালটোৰ ঘৰত কাম কৰিবলৈ অহা ৰঙৰ মিস্ত্ৰীৰ উপস্থিতিৰ পিছতহে সমগ্ৰ ঘটনা পোহৰলৈ আহে ৷ মিস্ত্ৰীগৰাকীয়ে স্থানীয় লোকৰ সহযোগত পৰিয়ালটোক উদ্ধাৰ কৰি বৰপেটা অসামৰিক চিকিৎসালয়ত ভৰ্তি কৰে । সম্প্ৰতি চিকিৎসাধীন হৈ আছে জেহেৰুলসহ পৰিয়ালৰ আন সদস্যসকল ৷ ইতিমধ্যে এই ঘটনা সন্দৰ্ভত জেহেৰুলৰ পৰিয়ালৰ আন সদস্যসকলে কলগাছিয়া আৰক্ষী থানাত দাখিল কৰিছে এক এজাহাৰ ৷

উল্লেখ্য যে, পৰিয়ালটোৱে নিশাৰ আহাৰ প্ৰস্তুত কৰি ৰখাৰ পিছত ৰান্ধনীঘৰৰ পৰা এক শব্দ অহা অনুমান কৰিছিল ৷ উক্ত শব্দৰ ভিত্তিত পৰিয়ালটোৰ এগৰাকী সদস্যই ৰান্ধনীঘৰত উপস্থিত হয় যদিও কাকো প্ৰত্যক্ষ নকৰিলে ৷ কিন্তু এই লুটপাতৰ ঘটনা সংঘটিত হোৱাক কেন্দ্ৰ কৰি পৰিয়ালটোৰ খাদ্যত কোনো দুৰ্বৃত্তই নিচাযুক্ত দ্ৰব্য মিহলাই দিয়াৰ অনুমান কৰা হৈছে ৷

লগতে চাওকঃবিজেপিৰ পৰা নিলম্বিত হ’ল বিতৰ্কিত নেত্ৰী দীপাঞ্জলী কাকতি