মইনবড়ীৰ জয়পুৰ বজাৰত জব্দ অংগনবাদী কেন্দ্ৰৰ চাউল আৰু মটৰ

মইনবড়ীৰ জয়পুৰ বজাৰত বৃহস্পতিবাৰে নিশা জব্দ অংগনবাদী কেন্দ্ৰৰ চাউল আৰু মটৰ (Illegally Smuggling Rice and peas in Barpeta)। অংগনবাদী কেন্দ্ৰৰ কৰ্মীৰ ঘৰৰ পৰা ই-ৰিক্সাৰে বজাৰলৈ লৈ যোৱাৰ সময়ত ৰাইজে জব্দ কৰে ৬ বস্তা চাউল আৰু ২ বস্তা মটৰ । আৰক্ষী আৰু সাংবাদিক উপস্থিতিত ঘটনাস্থলীৰ পৰা পলায়ন কৰে হাফিজুৰ ৰহমান আৰু আমানুৰ নামৰ দুই ব্যক্তি ৷

জনীয়া, ২২ এপ্ৰিল : চৰকাৰে কণ কণ শিশু আৰু গৰ্ভৱতী মহিলাৰ বাবে অংগনবাদী কেন্দ্ৰৰ জৰিয়তে খাদ্য সামগ্ৰী যোগান ধৰি আহিছে ৷ কিন্তু চৰকাৰী এই খাদ্য সামগ্ৰীসমূহ ৰাইজৰ মাজত বিতৰণ কৰাৰ পৰিৱৰ্তে একাংশ কৰ্মীয়ে গোপনে বিক্ৰী কৰি অহাৰ অভিযোগ উত্থাপিত হৈছে । এইবাৰ তেনে এক ঘটনা সংঘটিত হৈছে বৰপেটা জিলাৰ মন্দিয়া সংহত শিশু উন্নয়ন প্ৰকল্পৰ অধীনস্থ কিছমত মইনবড়ীৰ ১২১ নং অংগনবাদী কেন্দ্ৰত ।

ৰাইজৰ অভিযোগ অনুসৰি, মইনবড়ীৰ ১২১ নং অংগনবাদী কেন্দ্ৰটোত সংঘনে সংঘটিত হৈ আহিছে অনিয়ম ৷ অংগনবাদী কেন্দ্ৰটোৰ কৰ্মী শ্বাজিদা খাতুনে বিভিন্ন সময়ত কেন্দ্ৰটোৰ নামত অহা চৰকাৰী সাহাৰ্য হৰলুকী কৰাৰ অভিযোগ উত্থাপন কৰিছে স্থানীয় ৰাইজে ৷ তেনে এক ঘটনাই সংঘটিত হৈছে বৃহস্পতিবাৰে নিশা ৷

ঘটনাৰ বিৱৰণি অনুসৰি, বৃহস্পতিবাৰে নিশা অংগনবাদী কেন্দ্ৰটোৰ কৰ্মী শ্বাজিদা খাতুনে কেন্দ্ৰটোৰ নামত অহা চৰকাৰী ৬ বস্তা চাউল আৰু ২ বস্তা মটৰ বিক্ৰী কৰে একে গাঁৱৰে হাফিজুৰ ৰহমান আৰু আমানুৰক (Rice and peas of Anganwadi center seized in Barpeta market) ৷ আনকি শ্বাজিদা খাতুনে বিক্ৰী কৰা চাউল আৰু মটৰ খিনি নিয়াৰ বাবে হাফিজুৰ ৰহমান আৰু আমানুৰক ব্যৱহাৰ কৰিবলৈ দিছিল তেওঁৰ ঘৰৰ ই-ৰিক্সাখনো ৷

লগতে পঢ়ক :বৰপেটাত 84 বস্তা চোৰাং চাউল জব্দ

কিন্তু দশা বেয়া আছিল শ্বাজিদা খাতুনৰ লগতে হাফিজুৰ ৰহমান আৰু আমানুৰৰ ৷ চৰকাৰী সামগ্ৰীখিনি বিক্ৰী কৰিবলৈ লৈ যোৱাৰ সময়ত জয়পুৰ বজাৰত ৰাইজে জব্দ কৰে ই-ৰিক্সাৰসহ ফিজুৰ ৰহমান আৰু আমানুৰক । লগে লগে অঞ্চলটোত সৃষ্টি হয় এক উত্তেজনাময় পৰিস্থিতি ৷ তাৰ পাচতেই খবৰ দিয়া হয় মইনবড়ী আৰক্ষীক ৷

মইনবড়ী আৰক্ষীৰ উপস্থিতিৰ উমান পাই ঘটনাস্থলীৰ পৰা পলায়ন কৰে হাফিজুৰ ৰহমান আৰু আমানুৰে ৷ এই কথা সংবাদ মাধ্যমৰ আগত সদৰী কৰে ই-ৰিক্সা চালকগৰাকীয়ে ৷ ৰাইজৰ অভিযোগ, এই ঘটনা সন্দৰ্ভত শ্বাজিদা খাতুনৰ লগত জড়িত আছে আন কেইবাজনো ব্যক্তি ৷ এই ঘটনা সন্দৰ্ভত ৰাইজে ইতিমধ্যে মইনবড়ী আৰক্ষী চকীত দাখিল কৰে এক এজাহাৰ ৷ এই এজাহাৰৰ ভিত্তিত আৰক্ষীয়ে আৰম্ভ কৰিছে এক তদন্ত ৷

লগতে পঢ়ক :প্লাষ্টিকৰ চাউল নে প্ৰ’টিনযুক্ত চাউল: বিমোৰত অভিভাৱক-অংগনবাদী কৰ্মী