বৰপেটাৰ ভেল্লাত অপহৃত শিশু উদ্ধাৰ

বৰপেটাৰ ভেল্লাত এটি অপহৃত শিশু উদ্ধাৰৰ ঘটনাক লৈ সৃষ্টি হৈছে তীব্ৰ চাঞ্চল্যৰ ৷ অপহৃত শিশুটিৰ ভাষ্য অনুসৰি, শনিবাৰে ৰাতিপুৱা গুৱাহাটী কটহবাৰীৰ আকিবুল আলী নামৰ এজন যুৱকে অপহৰণ কৰে ৷ বৰ্তমান আৰক্ষীৰ জিম্মাত আছে শিশুটি ৷

বৰপেটা, 29 মে' :ৰাজ্যত দিনক দিনে বৃদ্ধি পোৱা শিশু আৰু নাৰী অপহৰণৰ ঘটনাৰ মাজতে বৰপেটাৰ ভেল্লাত অপহৃত শিশু উদ্ধাৰৰ ঘটনাক লৈ সৃষ্টি হৈছে তীব্ৰ চাঞ্চল্যৰ ৷ অপহৃত শিশুটিৰ ভাষ্য অনুসৰি শনিবাৰে ৰাতিপুৱা গুৱাহাটী কটহবাৰীৰ আকিবুল আলী নামৰ এজন যুৱকে তেওঁক ফুচুলাই বাইকত উঠাই অপহৰণ কৰিছিল ।

অপহৰণকাৰী যুৱকজনক চিনাকি সূত্ৰে মটৰ চাইকেলত উঠি ফুৰিবলৈ গৈছিল শিশুটি ৷ গুৱাহাটীৰ পৰা মটৰ চাইকেলত লৈ অহা যুৱকজনে, ভেল্লা গাঁৱৰ সমীপত এখন দোকানত গুটখা খাবলৈ লোৱাৰ সুযোগতে শিশুটোৱে পলায়ন কৰিবলৈ সক্ষম হয় ৷

ঘন্টাৰ পিচত ঘন্টা ধৰি মটৰ চাইকেলত উঠাই বহু দূৰলৈ লৈ গৈ থকা কথাত সন্দেহ কৰি শিশুটিয়ে সুযোগ বুজি পলায়ন কৰি কান্দি কান্দি দৌৰি থকাত বৰপেটাৰ ভেল্লাৰ একাংশ লোকে শিশুটিক সোধ পোচ কৰাত সকলো কথা ওলাই পৰে ৷ অৱশ্যে এই ঘটনাৰ মাজতে অপহৰণকাৰী যুৱকজনে সুযোগ বুজি পলায়ন কৰে । অৱশেষত ভেল্লাৰ স্থানীয় লোকৰ তৎপৰতাত উক্ত শিশুটিক বৰপেটা আৰক্ষীক গতাই দিয়া হয় ।

লগতে পঢ়ক :আন যুৱকৰে প্ৰেম : স্বামীয়ে ডিঙি চেপি হত্যা কৰিলে পত্নীক