বৰপেটা,২৯ নৱেম্বৰ: "শীঘ্ৰে চৰকাৰে অসমত সম্পূৰ্ণ কৰিব লাগে NRCৰ প্ৰক্ৰিয়া ৷ NRC ৰ বাবে অসমত দ্বিতীয় অসম আন্দোলন হ'বলৈ নিদিও ৷" এন আৰ চি আৰু কেব সন্দৰ্ভত এই মন্তব্য সৰুক্ষেত্ৰীৰ বিধায়ক জাকিৰ হুছেইন শিকদাৰৰ ৷ অসম চুক্তিক সন্মান জনাই অসম আন্দোলনত 855 জন শ্বহীদৰ কথাও উল্লেখ কৰি এতিয়া উন্নয়নৰ আন্দোলন হ'ব লাগে বুলি মন্তব্য কৰে শিকদাৰে।
ইয়াৰোপৰি বিধায়কগৰাকীয়ে কয় যে অসমীয়া মাজত ধৰ্ম-ভাষা এইবোৰক লৈ আন্দোলন হোৱাটো তেওঁ নিবিছাৰে। লগতে এন আৰ চিৰ ভিত্তিবৰ্ষ 71ৰেই থাকিব বুলিও তাৎপৰ্যপূৰ্ণ মন্তব্য কৰে শিকদাৰে। ভাৰতীয় জাতীয় কংগ্ৰেছ দলে নাগৰিকত্ব সংশোধনী বিধেয়ক 2016 বিৰোধিতা কৰি আছে আৰু ব্যক্তিগতভাৱে ময়ো এই বিধেয়কৰ বিৰোধিতা কৰি আছো বুলিও উল্লেখ কৰে বিধায়ক গৰাকীয়ে।
আনহাতে সংখ্যালঘু বিধায়কসকলক ৰোহিংগিয়াৰ বংশধৰ বুলি কোৱা বিজেপি নেতা মমিনুল আৱালৰ বিৰুদ্ধে সোচ্ছাৰ হৈ পৰে জাকিৰ হুছেইন শিকদাৰ। মমিনুল আৱালক প্ৰথমে DNA পৰীক্ষা কৰি তেওঁ কাৰ বংশধৰ সেইটো জানি ল'বলৈ উপদেশ দিয়ে শিকদাৰে। শংকৰ-আজান ফকীৰৰ এই পবিত্ৰ ভূমিত মমিনুল আৱালৰ স্থান নাই বুলি উল্লেখ কৰি মমিনুল আৱালক এখন সুকীয়া ৰাষ্ট্ৰ গঠনৰ পৰামৰ্শ প্ৰদান কৰে জাকিৰ হুছেইন শিকদাৰে। যিখন ৰাষ্ট্ৰত মমিনুল আৱাল খোদ প্ৰধানমন্ত্ৰী আৰু শিলাদিত্য দেৱ মুখ্যমন্ত্ৰী হ'ব পাৰে তেনে ৰাষ্ট্ৰ গঠন কৰিবলৈ মমিনুল আৱালক আহ্বান জনায় বিধায়কগৰাকীয়ে ।
লগতে পঢ়ক:ৰাজ্যজুৰি বিজেপিৰ বিৰুদ্ধে কংগ্ৰেছৰ প্ৰতিবাদ
