বন বিভাগৰ চকুৰ সন্মুখতে বেঁকী নৈত চলিছে অবৈধ বালি খনন

কলগাছিয়াৰ আমগুৰিত বেঁকী নদীৰ কাষত বন বিভাগৰ চকুৰ সন্মুখতে চলিছে অবৈধ বালি খনন । কেইবাখনো ট্ৰেক্টৰ লগাই দিনে নিশাই অবৈধ বালি খনন অব্যাহত ৰখাৰ ফলত ক্ষোভিত হৈ পৰিছে আমগুৰি গাঁওৰ ৰাইজ ।

জনীয়া, ৫ নৱেম্বৰ : ৰাজ্যত অব্যাহত আছে অবৈধ বালি খনন । কিন্তু দেখি শুনিও কোনো ব্যৱস্থা নোলোৱাৰ অভিযোগ বন বিভাগৰ বিৰুদ্ধে । উল্লেখ্য যে বৰপেটা জিলাৰ কলগাছিয়া ৰাজহ চক্ৰ তথা কলগাছিয়া আৰক্ষী থানাৰ আন্তৰ্গত আমগুৰি গাঁৱৰ বেঁকী নদীৰ কাষত দিনে নিশাই চলিছে এনে অবৈধ বালি খনন । এই খনন কাৰ্যৰ ফলত কলগাছিয়া ৰাজহ চক্ৰৰ আমগুৰি আৰু শওপুৰ আদি অঞ্চলত বেঁকী নদীৰ গৰাখহনীয়াই তীব্ৰ ভাবুকি কঢ়িয়াই আনিছে ।

ৰাজ্যৰ বনবিভাগৰ বৰপেটা ৰোড সংমণ্ডল আৰু বৰপেটা জিলা প্ৰশাসনক মেনেজ কৰি কেইবাখনো ট্ৰেক্টৰ লগাই এক সপ্তাহ ধৰি এইদৰে খনন কাৰ্য চলাই আহিছে বুলি স্থানীয় ৰাইজে অভিযোগ কৰিছে । বাৰিষা অন্ত পৰাৰ লগে লগেই এনেদৰে খনন কাৰ্য চলোৱাটো দুৰ্ভাগ্যজনক বুলি মন্তব্য কৰে ৰাইজে । বালি মাফিয়া ক্ৰমে আনোৱাৰ, আব্দুল আজিজ আৰু হাকিম উদ্দিনে অবৈধ ভাৱে খনন কাৰ্য চলাই আহিছে বুলি ৰাইজে জানিবলৈ দিয়ে ।

এনে কাৰ্য বন্ধ নহ'লে আগন্তুক দিনত গৰাখহনীয়া আৰু বেছি ভয়ংকৰ ৰূপ ধাৰণ কৰাৰ আশংকা কৰা হৈছে । যাৰ বাবে ক্ষোভিত হৈ পৰিছে স্থানীয় ৰাইজ । সেয়ে অতি শীঘ্ৰেই এই অবৈধ খনন কাৰ্য বন্ধ কৰিবলৈ প্ৰশাসনৰ হস্তক্ষেপ দাবী কৰিছে স্থানীয় ৰাইজে ।

লগতে পঢ়ক :মাজুলীবাসীয়েও উদযাপন কৰিলে পোহৰৰ উৎসৱ দীপাৱলী