Barpeta Marriage Controversy: বৰপেটাৰ বিয়াখনক লৈ সৰৱ চৰ্চা, আত্মপক্ষ সমৰ্থন দুয়োটা পক্ষৰ

‘‘আমি ধনী ঘৰৰ মানুহ নহয়, বহু কষ্ট কৰি বিয়াখন পাতিছিলোঁ, তেওঁলোকে কইনাই কাপোৰযোৰ বেয়া পিন্ধিছে বুলি কৈছিল, গহনাও তেওঁলোকে বিচৰামতে নাছিল, তাৰ পিছতহে জোৰোণৰ বস্তুক লৈ কথাৰ কটাকটি হৈছিল দুয়োৰে মাজত ৷’’ বৰপেটাৰ বিয়াক লৈ অব্যাহত অভিযোগ প্ৰতি-অভিযোগ ৷

বৰপেটা, 17 ডিচেম্বৰ:এনেকৈয়ে সপোনবোৰ ভাগে...চানচিল্ক চেম্পুৱে যেতিয়া বিয়া ভাঙে...৷ হয়, বৰপেটাৰ বিয়াখনক লৈ এতিয়া ৰাজ্যজুৰি চলিছে সৰৱ চৰ্চা চলি থকাৰ কথা আপুনি নিশ্চয় অৱগত ৷ জোৰোণত কম দামৰ সামগ্ৰী দিয়াক লৈ কইনাই ভাবী স্বামীলৈ প্ৰেৰণ কৰা অভিযোগৰ মেচেজৰ পিছতেই বিয়াত নবহাৰ সিদ্ধান্ত ল’লে গুৱাহাটীৰ দৰা দিব্যজ্যোতি তালুকদাৰে(Guwahati groom refused to marry) ৷

এই ঘটনাক লৈ এতিয়া অব্যাহত আছে দৰা আৰু কইনা পক্ষৰ অভিযোগ প্ৰতি-অভিযোগ ৷ দৰা দিব্যজ্যোতি তালুকদাৰে(Groom Dibyajyoti Talukdar) কইনা ধীৰা দাসৰ(Bride Dhira Das) বিৰুদ্ধে কেতবোৰ অভিযোগ উত্থাপন কৰাৰ পিছতেই এইবাৰ প্ৰতিক্ৰিয়া প্ৰকাশ কৰিছে কইনাৰ ভাতৃয়ে ৷

কইনা ধীৰা দাসে দৰালৈ কৰা মেছেজ সম্পৰ্কে ধীৰা দাসৰ ভাতৃৰ মন্তব্য- ‘‘ জোৰোণ দি যোৱাৰ পিছতেই দৰাৰ দেউতাকে ফোন কৰি জনাইছিল জোৰোণত অহা লোকক দিয়া খাদ্য হেনো ভাল নহ'ল ৷ হয়তো খাদ্যখিনি ভাল নাপাব পাৰে ৷ কাৰণ জোৰোণত অহা সময় আছিল দূপৰীয়া ৷ কিন্তু জোৰোণ আহি পাইছিল প্ৰায় ৪ বজাৰ পিচত ৷’’

মুঠৰ ওপৰত এতিয়া আত্মপক্ষ সমৰ্থনত উঠি পৰি লাগিছে দুয়োটা পক্ষ ৷ পুনৰ কইনাৰ ভাতৃৰ মন্তব্য- ‘‘ আমি ধনী ঘৰৰ মানুহ নহয়, বহু কষ্ট কৰি বিয়াখন পাতিছিলোঁ, তেওঁলোকে কইনাই কাপোৰ যোৰ বেয়া পিন্ধিছে বুলি কৈছিল, গহনাও তেওঁলোকে বিচৰামতে নাছিল, তাৰ পিছতহে জোৰোণৰ বস্তুক লৈ কথাৰ কটাকটি হৈছিল দুয়োৰে মাজত ৷’’

ইফালে, কইনাৰ কাপোৰ, গহনা আৰু খাদ্যক লৈ মন্তব্য কৰাৰ বাবাহে ভণ্টীয়ে তেনেদৰে মেচেজ কৰিছিল, দৰাজনৰ ঘৰৰ মানুহক ভণ্টীয়ে একো কোৱা নাছিল, কেৱল দৰা জনকহে কৈছিল বুলিও মন্তব্য কৰে কইনা ধীৰা দাসৰ ভাতৃয়ে ৷ লগতে, দৰাৰ পৰা কোনো সামগ্ৰী কইনাই দাবী কৰা নাছিল বুলি মন্তব্য ধীৰা দাসৰ ভাতৃৰ ৷

উল্লেখ্য যে, কেৱল কইনাই প্ৰেৰণ কৰা মেচেজ সমূহে কেৱল কিয় দৰাই ৰাজহুৱা কৰিছে বুলিও মন্তব্য ধীৰা দাসৰ ভাতৃৰ ৷ দৰাই কৰা মেচেজ সমূহ ৰাজহুৱা কৰিলেহে সকলো কথা স্পষ্ট হ’ব বুলিও দাবী কইনাৰ ভাতৃৰ ৷ দৰাই বহু অশ্লীল ভাষাৰে মেচেজ প্ৰেৰণ কৰাৰো অভিযোগ কইনা ধীৰা দাসৰ ভাতৃৰ ৷

এই দৰেই এতিয়া দুয়োপক্ষৰ মাজত চলিছে অভিযোগ প্ৰতি-অভিযোগৰ অঘোষিত প্ৰতিযোগিতা ৷ বিয়াখনক লৈ সামাজিক মাধ্যমতো ওলাইছে বহু ৰসাল কথা ৷ বহুতে কৈছে-‘‘ ফেচবুকত হেনো ভৰি দিবলৈ ঠাই নোহোৱা হ’ল, কেও দিশে কেৱল চেম্পু আৰু চেম্পু ৷’’

লগতে পঢ়ক:Young Talented Artistes Award 2022 : মিনাংক ডেকালৈ যুৱ প্ৰতিভাশালী শিল্পী বঁটা