বিপদ সীমাৰ ওপৰেৰে বৈছে বেকী নৈ

বিগত দুদিন ধৰি হৈ থকা নেৰা নেৰানেপেৰা বৰষুণৰ ফলত ভূটানৰ পৰা নামি অহা পানীয়ে বৰপেটা কলগাছিয়া ৰাজহ চক্ৰৰ অন্তৰ্গত বেঁকী নদীৰ বাঢ়নী পানীয়ে পুনৰ দ্বিতীয়বাৰৰ বাবে ২০ খনৰো অধিক গাওঁ প্লাৱিত কৰে

জনীয়া,২৪ জুলাই: বেকী নৈত বিপদ সীমাৰ ওপৰেৰে বৈছে পানী। কলগাছিয়াৰ সুতিৰপাথাৰ আৰু খাৰবাল্লী বৰ্ণাত্যৰ মাজত হাহাকাৰ। বিগত দুদিন ধৰি হৈ থকা নেৰা নেৰানেপেৰা বৰষুণৰ ফলত ভূটানৰ পৰা নামি অহা পানীয়ে বৰপেটা কলগাছিয়া ৰাজহ চক্ৰৰ অন্তৰ্গত বেঁকী নদীৰ বাঢ়নী পানীয়ে পুনৰ দ্বিতীয়বাৰৰ বাবে ২০ খনৰো অধিক গাওঁ প্লাৱিত কৰে। যাৰ ফলত বৰডাঙ্গা,গুইলেজা,মিনিশিমলা,মোৱামাৰী,বেচিমাৰী,লাচাংগা, কাচুকাটি,কাউৰঝাহী,বলাইপথাৰ,খাৰবাল্লি,ডাউকমাৰী,সুতিৰপাথাৰ,আমগুৰি আৰু উদমাৰী গাঁৱৰ বৰ্ণাত্যৰ অৱস্থা শোচনীয় হৈ পৰিছে।

উল্লেখ্য যে,প্ৰথমটো বানৰ পানী কমাত বৰ্ণাত্যই শিবিৰ এৰি ঘৰলৈ যাবলৈ আৰম্ভ কৰিছিল যদিও কালি ৰাতিৰ পৰা বেঁকী নৈৰ বুকু উফন্দি উঠি মানুহৰ ঘৰ-দুৱাৰত এক আঁঠু পানী সোমোৱাত পুনৰ আশ্ৰয় শিবিৰলৈ ঢাপলি মেলিছে বৰ্ণাত্যই। কিন্তু বান-শিবিৰ সমূহত নাই বান সাহায্য,নাই পশুধনৰ খাদ্য,নাই চিকিৎসা,নাই বিশুদ্ধ খোৱাপানী। যাৰ বাবে আকৌ বৃহত্তৰ কলগাছিয়া অঞ্চলত হাহাকাৰ পৰিস্থিতিৰ সৃষ্টি হৈছে।