বৰপেটা, ৩০ জানুৱাৰী: নিখিল ভাৰত কৃষক সভাৰ আহ্বানমৰ্মে শনিবাৰে সমগ্ৰ দেশতে প্ৰতিবাদী কাৰ্যসূচী ৰূপায়ণ কৰা হৈছে । দিল্লীৰ কৃষক আন্দোলনৰ প্ৰতি সমৰ্থন জনাই দেশৰ ভিন্ন প্ৰান্তৰ কৃষক সংগঠনে প্ৰতিবাদত নামিছে । এই কাৰ্যসূচীৰ অংশ হিচাপে ষি আইন বাতিলৰ দাবীত শনিবাৰে বৰপেটাত নিখিল ভাৰত কৃষক সভাৰ জিলা সমিতিয়ে অনশন ধৰ্মঘট কাৰ্যসূচী ৰূপায়ণ কৰে ।
জিলাখনৰ বিভিন্ন প্ৰান্তৰ কৃষকসকলে অনশন কাৰ্যসূচীত অংশগ্ৰহণ কৰি কৃষক বিৰোধী আইনৰ বিৰুদ্ধে সকলো দেশবাসীক ঐক্যৱদ্ধ হোৱাৰ আহ্বান জনায় ৷ কেন্দ্ৰীয় চৰকাৰৰ কৃষক বিৰোধী আইন নচলিব, কৃষক বিৰোধী ক'লা আইনৰ বিৰুদ্ধে সকলো মানুহ একগোট হওক আদি শ্ল'গানেৰে প্ৰতিবাদস্থলী উত্তাল কৰি তোলে ৷ কৃষক আন্দোলনক মষিমুৰ কৰাৰ উদ্দেশ্যৰে কেন্দ্ৰীয় চৰকাৰৰ গৃহ মন্ত্ৰালয়ে ষড়যন্ত্ৰ কৰিছে বুলি অভিযোগ উত্থাপন কৰে প্ৰতিবাদকাৰীয়ে ।
বিজেপিৰ এজন জ্যেষ্ঠ নেতাৰ নেতৃত্বতে দিল্লীৰ লালকিল্লাত পতাকা উত্তোলন কৰা হৈছিল বুলি অভিযোগ তুলিলে বৰপেটা জিলা কৃষক সভাৰ নেতৃত্বই ৷ আনহাতে, জাতিৰ পিতা মহাত্মা গান্ধীক ৰাষ্ট্ৰীয় স্বয়ং সেৱক সংঘৰ গুণ্ডাই গুলিয়াই হত্যা কৰিছিল বুলিও প্ৰতিবাদকাৰী কৃষক নেতাই মন্তব্য কৰে ৷ মহাত্মা গান্ধীৰ মৃত্যুৰ দিনটোতে আজি প্ৰতিবাদী কাৰ্যসূচী ৰূপায়ণ কৰে কৃষক সভাৰ বৰপেটা জিলা সমিতিয়ে ।
লগতে পঢ়ক:বৰপেটাত পালন জাতিৰ পিতা মহাত্মা গান্ধীৰ মৃত্যু দিৱস