জনীয়া, 6 নবেম্বৰ : বাঘবৰ সমষ্টিৰ বিধায়ক শ্বেৰমান আলী আহমেদৰ সমষ্টিত ৰাইজৰ দুৰ্দশা ৷ কলগাছিয়া ৰাজহ চক্ৰৰ অন্তৰ্গত চতলা গাঁৱত বেঁকী নৈৰ ভয়ংকৰ খহনীয়া । বিগত তিনিমাহ ধৰি একেদৰেই অব্যাহত আছে বেঁকী নদীৰ ভয়ংকৰ গৰাখহনীয়া । খহনীয়াত প্ৰায় ৪০ টাৰো অধিক পৰিয়ালৰ ঘৰ-ভেটি উছন হোৱাত ওচৰতে থকা গো-ভেটিত পশুধনৰ সৈতে সহাৱস্থান কৰিব লগা হৈছে ৰাইজে ।
আনহাতে গাঁওখনৰ ২৭৩ নং প্ৰাথমিক বিদ্যালয়খন এইদৰে চকুৰ সন্মুখতে নৈৰ বুকুত জাহ যোৱাৰ লগতে আন অৰ্ধ শতাধিক পৰিয়াললৈ ভাবুকিৰ সৃষ্টি হোৱাত আতংকিত হৈ পৰিছে নৈ পৰীয়া ৰাইজ । ইফালে খহনীয়াগ্ৰস্ত লোকৰ মাজত বিশুদ্ধ খোৱাপানী, শৌচাগাৰ আদিৰ সংকটে দেখাদিছে যদিও কোনো এজন জনপ্ৰতিনিধি তথা প্ৰশাসনে ভুক্তভোগীৰ খবৰ ল’বলৈ আহৰি পোৱা নাই । স্মৰ্তব্য যে, খহনীয়াত জাহ যোৱা বিদ্যালয়খনত আছিল দুটাকৈ ভোট গ্ৰহণ কেন্দ্ৰ । শীঘ্ৰে খহনীয়া প্ৰতিৰোধ কৰাৰ লগতে ক্ষতিগ্ৰস্থ লোকক ক্ষতিপূৰণ আৰু পুনৰ সংস্থাপনৰ দাবী জনাইছে ৰাইজে ।