ধান বানিবলৈ আহি বিদ্যুতস্পৃষ্ট হ’ল কিশোৰ

এক ভয়ংকৰ ঘটনা সংঘটিত হৈছে বৰপেটা জিলাৰ কলগাছিয়াত । ধান বানিবলৈ আহি বিদ্যুতস্পৃষ্ট হৈ আহত হ’ব লগীয়া হ’ল এজন কিশোৰ । সম্প্ৰতি মৃত্যুৰ সৈতে যুঁজি আছে কিশোৰ গৰাকীয়ে ।

কলগাছিয়া, 8 মে’: বৰপেটা জিলাৰ কলগাছিয়া আৰক্ষী থানাৰ অন্তর্গত শৰীয়াতপুৰত সংঘটিত হৈছে এক ভয়ংকৰ ঘটনা । ধান বানিবলৈ আহি বিদ্যুতস্পৃষ্ট হয় এজন কিশোৰ ৷ অভিযোগ অনুসৰি ইমৰাদ আলি খান নামৰ ৰাইচমিলৰ স্বতাধিকাৰী গৰাকীয়ে ধান বানিবলৈ অহা কিশোৰ এজনক বিদ্যুৎৰ বেমেজালি ঠিক কৰিবলৈ হাই ভল্টেজ ট্ৰেন্সফৰ্মাৰত বলপূৰ্বকভাৱে উঠাই দিয়ে ৷ ট্ৰেন্সফৰ্মাৰত উঠাৰ লগে লগে বিদ্যুতস্পৃষ্ট হৈ কিশোৰজন চিটিকি কাষত ৰড ওলাই থকা দেৱালত পৰি গুৰুতৰভাৱে আঘাতপ্ৰাপ্ত হয় ।

জানিব পৰা মতে, আহত কিশোৰগৰাকীক লগে লগে কলগাছিয়াস্থিত বৰপেটা অসামৰিক চিকিৎসালয়ত ভৰ্তি কৰা হয় যদিও, অৱস্থা সংকটজনক হোৱা বাবে তেওঁক বৰপেটা মেডিকেল কলেজ হাস্পতাললৈ প্ৰেৰণ কৰা হয় । সম্প্ৰতি মৃত্যুৰ সৈতে যুঁজি আছে কিশোৰ গৰাকীয়ে । ইফালে, কিশোৰ গৰাকীৰ মাতৃৰ লগতে স্থানীয় ৰাইজে ঘটনাটোৰ উচিত তদন্ত কৰি দোষীৰ শাস্তি বিচাৰে ।

লগতে পঢ়ক:কেইজন বিধায়কৰ স্বাক্ষৰ লৈ দিল্লীলৈ গৈছিল পীযুষ হাজৰিকা ?