বৰপেটা,15 মে': শুকুৰবাৰে ৰাজ্যজুৰি পালন কৰা হয় পবিত্ৰ ঈদ উল ফিতৰ ৷ বৰপেটা চহৰৰ মূল ঈদগাহ ময়দানতো শুকুৰবাৰে অনুষ্ঠিত নহ'ল ঈদ উল ফিতৰৰ সমূহীয়া নামাজ ৷ মহামাৰী কৰ’ণাসৃষ্ট ভয়াৱহ পৰিস্থিতি তথা কৰ’ণা নিৰ্মূল আৰু সংক্ৰমণ ৰোধৰ বাবে চৰকাৰে জাৰি কৰা নিৰ্দেশনা মানি বৰপেটাত সমুহীয়া ঈদৰ নামাজত অংশ নল’লে কোনো ইছলামধৰ্মী লোকে ৷ বিপৰীতে ঘৰে ঘৰে ঈদৰ নামাজ আদায় কৰে প্ৰতিগৰাকী ইছলামধৰ্মী লোকে ৷
বৰপেটাত ক’ভিড প্ৰট’কল মানি ঈদ ঊল ফিতৰৰ নামাজ আদায়
এমাহজোৰা ৰমজানৰ ৰোজাৰ পিছত হাজাৰ হাজাৰ ইছলামধৰ্মী লোকে ঈদৰ নামাজত অংশগ্ৰহণ কৰাৰ বিপৰীতে বৰপেটাৰ ঈদগাহ ময়দানত এইবেলি দেখা গ'ল এক নিস্তেজ, উকা পৰিৱেশ ৷ আনকি চৰকাৰী নিৰ্দেশৰ প্ৰতি সন্মান জনাই বৰপেটা চহৰত থকা ঈদগাহ ময়দানখনৰ মূল প্ৰৱেশপথ বন্ধ কৰি দিয়ে ঈদগাহ সমিতিয়ে ৷