বৰপেটা, ১ জানুৱাৰী :অসম চৰকাৰৰ উদ্যোগত আয়োজিত খেল মহাৰণৰ জিলা পৰ্যায়ৰ প্ৰতিযোগিতা সোমবাৰৰ পৰা দুদিনীয়াকৈ বৰপেটা জিলাত অনুষ্ঠিত হৈছে । বৰপেটা জিলা ক্ৰীড়া সন্থাৰ খেলপথাৰত অনুষ্ঠিত এই প্ৰতিযোগিতা আজি মুকলি কৰে জিলা আয়ুক্ত আয়ুষ গাৰ্গে । উল্লেখ্য যে, সুপ্ত প্ৰতিভাধৰক তেওঁলোকৰ পাৰদৰ্শিতা প্ৰকাশৰ এখন মঞ্চ দিয়াৰ লগতে ৰাজ্যখনক ক্ৰীড়াৰ ক্ষেত্ৰত আগবঢ়াই নিয়াৰ উদ্দেশ্যে চৰকাৰৰ উদ্যোগত প্ৰথমবাৰৰ বাবে এই খেল মহাৰণ অনুষ্ঠিত কৰা হৈছে ।
আজিৰ আয়োজনৰ সন্দৰ্ভত জিলা আয়ুক্ত গাৰ্গে কয় যে, জিলাখনৰ বিভিন্ন বয়সৰ প্ৰায় এক লাখ ৬০ হাজাৰ খেলুৱৈয়ে খেল মহাৰণত অংশগ্ৰহণ কৰিছে । তেওঁলোকক লৈ গাঁও পঞ্চায়ত-পৌৰসভা পৰ্যায়ত, তাৰ পাচত সমষ্টি পৰ্যায়ত প্ৰতিযোগিতা অনুষ্ঠিত হয় । এনেদৰে স্তৰে স্তৰে বিজয়ী হৈ অহাসকলৰ মাজত জিলা পৰ্যায়ৰ প্ৰতিযোগিতা অনুষ্ঠিত হৈছে । জিলা পৰ্যায়ৰ পৰাই ৰাজ্যিক স্তৰত বৰপেটা জিলাক প্ৰতিনিধিত্ব কৰিবলগীয়া দলটো গঠন কৰা হ’ব । গাৰ্গে সদৰী কৰা অনুসৰি, জিলা পৰ্যায়ৰ প্ৰতিযোগিতাত প্ৰায় এঘাৰশ খেলুৱৈয়ে ভাগ লৈছে । তেওঁলোকে ভলীবল, ফুটবল, কাবাডী আৰু খো খো প্ৰতিযোগিতাত ভাগ ল’ব । প্ৰসংগক্ৰমে গাৰ্গে জনায় যে, বৰপেটা জিলাত থকা চৰ অঞ্চলৰো ২০ হাজাৰৰ অধিক প্ৰতিযোগীয়ে এই প্ৰতিযোগিতাত ভাগ লয় ৷