গাঁও পঞ্চায়তৰ সভানেত্ৰীক আক্ৰমণৰ ঘটনাত জড়িত দোষীক শাস্তিৰ দাবী

পাঠশালাৰ ডুমুৰীয়া গাঁও পঞ্চায়ত কাণ্ডত জড়িত ব্যক্তিৰ শাস্তিৰ দাবীত তিনিদিনীয়া কৰ্মবিৰতি পালন পঞ্চায়ত সচিবসকলৰ ৷ 24 ঘণ্টাৰ ভিতৰত আৰক্ষীয়ে দোষীক কৰায়ত্ত কৰিব নোৱাৰে তেন্তে 4 চেপ্তেম্বৰৰ দিনৰ 10 বজাৰ পৰা বিয়লি 3 বজালৈ দিনযোৰা কাৰ্যসূচীৰে জিলা পৰিষদৰ সন্মুখত অৱস্থান ধৰ্মঘট কাৰ্যসূচী পালন কৰিব পঞ্চায়তৰ সচিবসকলে ৷

বৰপেটা,3 চেপ্তেম্বৰ: বজালীৰ পাঠশালাৰ ডুমুৰীয়া গাঁও পঞ্চায়তৰ সচিব আৰু সভানেত্ৰীক কৰা অমানৱীয় অত্যাচাৰৰ প্ৰতিবাদত বৃহস্পতিবাৰৰ পৰা তিনিদিনীয়া কৰ্মবিৰতি পালন কৰিছে পঞ্চায়ত সচিবসকলে ৷ ৰাজ্যৰ গাঁও পঞ্চায়তসমূহৰ সচিবৰ নিৰাপত্তা সুনিশ্চিত কৰাৰ লগতে উক্ত কাণ্ডত জড়িত দোষীক 24 ঘণ্টাৰ ভিতৰত গ্ৰেপ্তাৰৰ দাবীত এই প্ৰতিবাদী কাৰ্যসূচী গ্ৰহণ কৰে সচিবসকলে ৷ যদিহে 24 ঘণ্টাৰ ভিতৰত আৰক্ষীয়ে দোষীক কৰায়ত্ত কৰিব নোৱাৰে তেন্তে 4 চেপ্তেম্বৰৰ দিনৰ 10 বজাৰ পৰা বিয়লি 3 বজালৈ দিনযোৰা কাৰ্যসূচীৰে জিলা পৰিষদৰ সন্মুখত অৱস্থান ধৰ্মঘট কাৰ্যসূচী পালন কৰিব পঞ্চায়তৰ সচিবসকলে ৷ তদুপৰি, সচিবসকলৰ নিৰাপত্তা সুনিশ্চিত নহ’লে 10 চেপ্তেম্বৰৰ পৰা অনিৰ্দিষ্টকাললৈ সৰ্বাত্মক কৰ্মবিৰতি পালনৰ কাৰ্যসূচী গ্ৰহণ কৰিব বুলি বৰপেটা জিলা গাঁও পঞ্চায়ত সচিব সন্থাই ঘোষণা কৰে ৷

উল্লেখ্য যে,বিগত বৃহস্পতিবাৰে প্ৰধানমন্ত্ৰী আৱাস যোজনাৰ হিতাধিকাৰীৰ তালিকাক কেন্দ্ৰ কৰি ডুমুৰীয়া গাঁও পঞ্চায়তৰ একাংশ উন্মাদ লোকে পঞ্চায়তৰ সচিবৰ দায়িত্বত থকা মনোৰঞ্জন দাস আৰু সভানেত্ৰীগৰাকীক বৰ্বৰ আচৰণ প্ৰদৰ্শন কৰিছিল ৷ সভ্য সমাজক লজ্জানত কৰা এনে কাণ্ডক সদৌ অসম গাঁও পঞ্চায়ত সচিব সন্থাৰ বৰপেটা জিলা সমিতিয়ে তীব্ৰ গৰিহণা দিয়াৰ দোষীৰ শাস্তিৰ দাবী জনাইছে ৷ পিছে আৰক্ষীয়ে এইপৰ্যন্ত মাথো এগৰাকী ব্যক্তিকহে ঘটনা সন্দৰ্ভত কৰায়ত্ত কৰাত অসন্তুষ্টি প্ৰকাশ কৰিছে সমিতিয়ে ৷ ইতিমধ্যে সমিতিখনে বৰপেটা জিলা পৰিষদৰ মুখ্য কাৰ্যবাহী বিষয়াৰ লগতে জিলা উপায়ুক্ত, ডি আৰ ডি এ-ৰ প্ৰকল্প সঞ্চালক আৰু জিলা খণ্ড উন্নয়ন বিষয়াসকলক ঘটনা সন্দৰ্ভত স্মাৰকপত্ৰ প্ৰেৰণ কৰিছে ৷

লগতে চাওকঃউত্তৰ গুৱাহাটীত জব্দ 10 লাখ টকা মূল্যৰ বিদেশী চিগাৰেট