বৰনগৰ কলেজৰ সহযোগী অধ্যাপকৰ মৃতদেহ উদ্ধাৰ

শিৱৰাত্ৰিৰ নিশাৰ পৰাই নিৰুদ্দেশ হৈ আছিল ড৹ মাধুৰ্য বৰা ৷ মৃতদেহটোত আঘাতৰ চিন নাই যদিও কাষত এচিড জাতীয় দ্ৰব্য উদ্ধাৰ হৈছে ৷ ড৹ মাধুৰ্য বৰাৰ ঘৰ লখিমপুৰৰ ঢেকীয়াজুলিৰ বিষ্ণুপুৰত ৷

বৰপেটাৰোড,13 মাৰ্চ: শনিবাৰে বাক্সাৰ শিমলাগুৰিত মৃতদেহ উদ্ধাৰ হোৱাত চাঞ্চল্যৰ সৃষ্টি হৈছে ৷ আঠিয়াবাৰী গাঁৱৰ পথাৰৰ পৰা উদ্ধাৰ হৈছে মৃতদেহটো ৷ মৃতদেহটো ড৹ মাধুৰ্য বৰা বুলি চিনাক্ত কৰা হৈছে ৷ সৰভোগৰ বৰনগৰ কলেজৰ সহযোগী অধ্যাপক হিচাপে কৰ্মৰত আছিল ড৹ মাধুৰ্য বৰা ৷

উল্লেখযোগ্য যে, শিৱৰাত্ৰিৰ নিশাৰ পৰাই নিৰুদ্দেশ হৈ আছিল বৰা ৷ মৃতদেহটোত আঘাতৰ চিন নাই যদিও কাষত এচিড জাতীয় দ্ৰব্য উদ্ধাৰ হৈছে ৷ ড৹ মাধুৰ্য বৰাৰ ঘৰ লখিমপুৰৰ ঢেকীয়াজুলিৰ বিষ্ণুপুৰত বুলি জানিব পৰা গৈছে ৷ বিগত ২০১৯ চনৰ পৰা বৰপেটাৰোডৰ ভাৰাঘৰত থাকি সৰভোগৰ বৰনগৰ কলেজত ৰসায়ন বিজ্ঞান বিষয়ত সহযোগী অধ্যাপক হিচাপে নিয়োজিত হৈ আছিল মৃত বৰা ৷ ইপিনে ৩১ বছৰীয়া অবিবাহিত অধ্যাপকজনক কোনে কি কাৰণত নিৰ্মমভাৱে হত্যা কৰিলে সেয়া বৰ্তমানলৈকে জানিব পৰা হোৱা নাই ৷ ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে ৷

সম্প্ৰতি অধ্যাপক ড৹ মাধুৰ্য বৰাৰ মৃতদেহ এনেদৰে উদ্ধাৰ হোৱাত বৰনগৰ কলেজৰ শিক্ষকগোটৰ লগতে ছাত্ৰ-ছাত্ৰীসকল শোকত ভাগি পৰিছে ৷ শিমলাগুৰি আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে বৰপেটালৈ প্ৰেৰণ কৰিছে ৷

লগতে পঢ়কঃ তিতাবৰত চাহ শ্ৰমিকৰ সৈতে ঝুমুৰ নৃত্যত ব্যস্ত কংগ্ৰেছ প্ৰাৰ্থী ভাস্কৰজ্যোতি বৰুৱা