জনীয়া, 15 ছেপ্টেম্বৰ :গো সুৰক্ষা আইন বাতিলৰ দাবীত চিপিআই(এম) ৰ অসম ৰাজ্যিক কমিটিয়ে মঙলবাৰে ৰাজ্যজুৰি তীব্ৰ প্ৰতিবাদ সাব্যস্ত কৰে ৷ ইয়াৰে অংশ হিচাপে চিপিআইএমৰ কলগাছিয়া আৰু তিতাপানী আঞ্চলিক সমিতিয়ে কলগাছিয়াত এক বিশাল প্ৰতিবাদী সমদল বাহিৰ কৰে ৷
এই বিক্ষোভ কাৰ্যসূচীত অংশগ্ৰহণ কৰা প্ৰতিবাদকাৰীসকলে চিপিআইএমৰ কলগাছিয়া আঞ্চলিক সমিতিৰ কাৰ্যালয়ৰ পৰা শোভাযাত্ৰা আৰম্ভ কৰি মৰাপাট বজাৰ হৈ ভাৰতীয় ষ্টেট বেংক চাৰিআলি হৈ চক্ৰ বিষয়াৰ কাৰ্যালয়ত উপস্থিত হৈ বিক্ষোভ প্ৰদৰ্শন কৰে ।
প্ৰতিবাদকাৰীসকলে সাম্প্ৰদায়িক গো-সুৰক্ষা আইন বাতিল কৰক, অসমৰ অৰ্থনীতি বিৰোধী গো-সুৰক্ষা আইন বাতিল কৰক, সংবিধান বিৰোধী গো-সুৰক্ষা আইন বাতিল কৰক, সাম্প্ৰদায়িক বিজেপি চৰকাৰ মুৰ্দাবাদ আদি শ্ল’গানেৰে ৰাজপথ আৰু চক্ৰ বিষয়াৰ কাৰ্যালয় চৌহদ উত্তাল কৰি তোলে ।
চিপিআইএমে গো-সুৰক্ষা আইন বাতিলৰ দাবীত চক্ৰ বিষয়াৰ জৰিয়তে ৰাজ্যপাললৈ এখন স্মাৰক পত্ৰ প্ৰেৰণ কৰে ৷ প্ৰতিবাদকাৰীসকলে লগতে এই আইনখন শীঘ্ৰে বাতিল নকৰিলে অনাগত দিনত ব্যাপক গণ আন্দোলন গঢ়ি তোলাৰ হুংকাৰ দিয়ে ।
লগতে পঢ়ক :নিমাতীঘাটত মুখ্যমন্ত্ৰী হিমন্ত বিশ্ব শৰ্মা : নিমাতীঘাটত সলনি হ’ব পূৰ্বৰ ৰূপ