জনীয়া গাঁও পঞ্চায়তৰ সভাপতি ছাবেদ আলীৰ বিৰুদ্ধে দুৰ্নীতিৰ অভিযোগ

জনীয়া গাঁও পঞ্চায়তত ৰাইজৰ কোনো উন্নয়নমূলক কাম হোৱা নাই আৰু সেই সম্পৰ্কে খণ্ড উন্নয়ন বিষয়াৰ ওচৰত অভিযোগ দাখিল কৰিলেও খণ্ড উন্নয়ন বিষয়াই বিহিত ব্যৱস্থা গ্ৰহণ নকৰাৰ অভিযোগ কৰিছে ৰাইজে ৷

বৰপেটা, 4 জুলাই :বৰপেটা জিলাৰ জনীয়া গাঁও পঞ্চায়তত বিভিন্ন আঁচনিৰ জৰিয়তে চৰকাৰে আৱন্টন দিয়াৰ টকাৰ ব্যাপক দুৰ্নীতি সংঘটিত হৈছে ৷ গাঁও পঞ্চায়তৰ সভাপতি ছাবেদ আলীয়ে নাম মাত্ৰ কাম কৰি আঁচনিৰ সমস্ত ধন হৰলুকি কৰাৰ অভিযোগ কৰিছে স্থানীয় ৰাইজে ৷

ৰাজ্যৰ প্ৰতিটো গাঁও পঞ্চায়তত 14 অৰ্থ আঁচনিকে ধৰি বিভিন্ন আঁচনিৰ জৰিয়তে চৰকাৰে কোটি কোটি টকা আবন্টন দিছে । বৰপেটা জিলাৰ ৮১ নং জনীয়া গাঁও পঞ্চায়তে চলিত বৰ্ষত প্ৰায় দুই কোটি টকা আবন্টন দিয়া হৈছিল। পঞ্চায়তটোৰ 7 নং খণ্ডৰ 3 লাখ 16 হেজাৰ টকা আবন্টন কৰা এটা ৰাস্তাত মাত্ৰ 20 মিটাৰ ঠাইত কিছু মাটি পেলাই বাকী টকা খণ্ডটোৰ সদস্যগৰাকীৰ লগত বুজাবুজিৰে সভাপতি ছাবেদ আলীয়ে আত্মসাৎ কৰাৰ অভিযোগ উঠিছে । দুৰ্নীতিত অভিলেখ গঢ়িবলৈ সক্ষম হোৱা কমিচন মাষ্টৰ জনীয়া গাঁও পঞ্চায়তৰ সভাপতি ছাবেদ আলীয়ে প্ৰতিটো কামৰ বিপৰীতে শতকৰা 14 টকা কমিছন লোৱাৰ অভিযোগ উত্থাপন হৈছে ।

পঞ্চায়তৰ সভাপতি ছাবেদ আলীৰ এনে নিকৃষ্ট মানসিকতাৰ কাৰণে পঞ্চায়তটোৰ সচিব,সদস্য,কনিষ্ঠ অভিযন্তাৰ লগতে খণ্ড উন্নয়ন বিষয়াও সুবিধা লৈছে বুলি ৰাইজে সন্দেহ প্ৰকাশ কৰিছে । জনীয়া গাঁও পঞ্চায়তত ৰাইজৰ কোনো উন্নয়নমূলক কাম হোৱা নাই আৰু সেই সম্পৰ্কে খণ্ড উন্নয়ন বিষয়াৰ ওচৰত অভিযোগ দাখিল কৰিলেও খণ্ড উন্নয়ন বিষয়াই বিহিত ব্যৱস্থা গ্ৰহণ নকৰাৰ অভিযোগ কৰিছে ৰাইজে ৷ জনীয়া গাঁও পঞ্চায়তত সংঘটিত দুৰ্নীতিৰ উচিত তদন্ত দাবী জনাইছে স্থানীয় ৰাইজে ।

লগতে পঢ়ক : পাকিস্তান বাছ দুৰ্ঘটনাঃ নিহত ১৯ গৰাকী শিখ তীৰ্থযাত্ৰী