বৰপেটা, ৭ ডিচেম্বৰ : ২০১২ বৰ্ষত উদীয়মান যুৱ শিল্পী বিশ্বজ্যোতি পাঠক (Artist Biswajit Pathak)ৰ পৰিকল্পনাৰে বৰপেটাত আৰম্ভ কৰা হৈছিল শিল্প কলাৰ এটা অগতানুগতিক অনুষ্ঠান- হাব ষ্টুডিঅ' (Hub Studio in Barpeta) ৷ শিল্পী বিশ্বজ্যোতি পাঠকৰ চিন্তা আৰু পৰিকল্পনাৰে আগবঢ়া 'হাব ষ্টুডিঅ'ত এতিয়া আৰম্ভ হৈছে ভাস্কৰ্য নিৰ্মাণৰ কাম ৷ সত্ৰনগৰী বৰপেটাত গুৰু দুজনাৰ দিনৰে পৰাই পৰম্পৰাগতভাৱে সত্ৰ, নামঘৰ আদিত বিবিধ মূৰ্তি নিৰ্মাণৰ কাম কৰি আহিছিল, যদিও আজিৰ সময়ৰ সৈতে খাপ খুৱাকৈ ভাস্কৰ্য নিৰ্মাণৰ ক্ষেত্ৰত কিছু পিচ পৰি আছিল ৷
শেহতীয়াকৈ হাব ষ্টুডিঅ'ৰ শিল্পী বিদ্যুৎ মণ্ডলে গুৱাহাটীত ভাস্কৰ্য শিল্পৰ শিক্ষা গ্ৰহন কৰি আহি বৰপেটাত নতুন সম্পৰীক্ষাৰে আৰম্ভ কৰিছে ভাস্কৰ্য শিল্পৰ কাম (Construction of Various Sculptures has Started at the Hub Studio) ৷ বিদ্যুৎ মণ্ডলৰ হাতত এতিয়া প্ৰাণ পাই উঠিছে বিভিন্ন জীৱ-জন্তুৰ লগতে সত্ৰীয়া সংস্কৃতিৰে যুক্ত বিভিন্ন শিল্পকৰ্ম ৷ উল্লেখ্য যে, কেনভাছৰ পৰিৱৰ্তে গামোছাত অসমৰ ঐতিহ্যক অংকন কৰি সংবাদ শিৰোনাম দখল কৰিবলৈ সক্ষম হোৱা বিদ্যুৎ মণ্ডলে নতুন চিন্তাৰে আৰম্ভ কৰা ভাস্কৰ্য শিল্পৰ জৰিয়তে সত্ৰনগৰী বৰপেটাক সমৃদ্ধ কৰি তোলাৰ এই পদক্ষেপ নিশ্চয়কৈ আদৰণীয় ৷