কৰ ফাঁকিৰ অভিযোগত ছীল হ’ল বৰপেটাৰ CityKart শ্বপিংমল

মঙলবাৰে মঙলৰ দশা ভাল নাছিল বৰপেটাৰ চিটিকাৰ্ট নামৰ শ্বপিংমলখনৰ (Citykart shopping mall sealed by Barpeta Municipality) ৷ বৰপেটা পৌৰসভাক কৰ ফাঁকি দিয়া আৰু চহৰখন লেতেৰা কৰাৰ অভিযোগত বৰপেটা পৌৰসভাই উক্ত শ্বপিংমলখন ছীল কৰি দিয়ে ৷

বৰপেটা, ২৩ আগষ্ট :বৰপেটাৰ সৌন্দৰ্য্যত ব্যাঘাত জন্মাইছে চিটিকাৰ্ট নামৰ শ্বপিংমলখনে (Citykart shopping mall in Barpeta)৷ কিয়নো চহৰখনৰ বিভিন্ন প্ৰান্তত বেনাৰ, ছাইনবোৰ্ড ইত্যাদি লগাই শ্বপিংমলখনে লেতেৰা কৰিছে চহৰখন ৷ এই অভিযোগ তৰিছে বৰপেটা পৌৰসভাই ৷ আনকি বৰপেটা পৌৰসভাই শীঘ্ৰেই বেনাৰ, পোষ্টাৰসমূহ চহৰখনৰ পৰা আঁতৰাই দিবলৈ নিৰ্দেশ দিছিল চিটিকাৰ্ট শ্বপিংমলখনৰ সংশ্লিষ্ট কৰ্তৃপক্ষক ৷

কিন্তু বৰপেটা পৌৰসভাৰ নিৰ্দেশক বুঢ়া আঙুলি দেখুৱাই চহৰখনৰ পৰা বেনাৰ পোষ্টাৰসমূহ আঁতৰোৱা নাছিল শ্বপিংমল কৰ্তৃপক্ষই ৷ যাৰ বাবে মঙলবাৰে বৰপেটা পৌৰসভাৰ উপ-পৌৰপতি ৰাজেন তালুকদাৰ নেতৃত্বত পৌৰসভাৰ সদস্যসকলে আৰক্ষীৰ সহযোগত উক্ত শ্বপিংমলখনত তলা ওলমায় (Citykart shopping mall sealed by Barpeta Municipality) । আনহাতে, তথ্য অনুসৰি শ্বপিংমলখনৰ নাই কোনো বৈধ নথি-পত্ৰ ।

আনকি শ্বপিংমলখনৰ নাই কোনো বৈধ ট্ৰেড লাইচেন্স আৰু লেবাৰ লাইচেন্সো (Valid Trade and Labour License)। ইয়াৰোপৰি বহুদিনৰ পৰা শ্বপিংমলখনে বৰপেটা পৌৰসভাক কৰ ফাঁকিও দি আহিছিল ।

নিয়মানুযায়ী শ্বপিংমলখনে বৰপেটা পৌৰসভাক বছৰি ২৫ হাজাৰ টকা কৰ দিব লাগে যদিও শ্বপিংমল কৰ্তৃপক্ষই মাথো ৪৫০ টকাহে আদায় দি আহিছিল । এই কথা সদৰী কৰে পৌৰসভাৰ উপ-পৌৰপতি ৰাজেন তালুকদাৰে । যাৰ বাবে বৰপেটা চহৰত অবৈধভাৱে চলি থকা চিটিকাৰ্ট শ্বপিংমলত বৰপেটা পৌৰসভাই ওলমালে তলা ৷

লগতে পঢ়ক :সাত দফীয়া দাবীপূৰণ বাবে মৰিগাঁৱত AMSU ৰ তীব্ৰ প্ৰতিবাদ