বৰপেটা, ৩ ছেপ্তেম্বৰ: ঐতিহাসিক মাজদিয়া গৰেমাৰী গো-ৰিজাৰ্ভৰ অস্তিত্বৰ প্ৰতি ভাবুকি । বৰপেটা জিলাৰ সৰ্থেবাৰীৰ মাজদিয়া গো-ৰিজাৰ্ভৰ মাটি অবৈধভাৱে দখল কৰি একাংশ লোকে বসতি স্থাপন কৰিছে । গো-ৰিজাৰ্ভখন বেদখলমুক্ত কৰাৰ বাবে ৰাইজে দাবী জনাই আহিছে যদিও সেয়া হৈ উঠা নাই । বুধবাৰে বিয়লি এই সন্দৰ্ভত মাজদিয়া-গৰেমাৰী গাঁও উন্নয়ন সমিতিৰ কাৰ্যালয়ত এক আলোচনা সভাৰ আয়োজন কৰা হয় । গৰেমাৰী গাঁও উন্নয়ন সমিতিৰ কাৰ্যকৰী সভাপতি কামৰুজ জামানৰ সভাপতিত্বত অনুষ্ঠিত সভাখনত অসম গণ পৰিষদৰ ৰাজ্যিক মুখপাত্ৰ ধৰ্মেশ্বৰ ৰয় উপস্থিত থাকে ।
মুখ্যমন্ত্ৰী ড০ হিমন্ত বিশ্ব শৰ্মাই বেদখল হোৱা সকলো ৰিজাৰ্ভ বেদখল মুক্ত কৰিবলৈ প্ৰচেষ্টা হাতত লোৱা বুলি সভাত প্ৰকাশ কৰে অগপ নেতা গৰাকীয়ে । লগতে চৰকাৰে শীঘ্ৰেই মাজদিয়া গো- ৰিজাৰ্ভো বেদখল মুক্ত কৰিব বুলি স্থানীয় খিলঞ্জীয়া ৰাইজক তেওঁ আশ্বাস দিয়ে । উল্লেখ্য যে, ২২৮ বিঘা মাটি বিস্তৃত হৈ থকা মাজদিয়া গো-ৰিজাৰ্ভ বেদখল মুক্ত কৰিবলৈ ইতিমধ্যে সৰ্থেবাৰী ৰাজহ চক্ৰৰ চক্ৰ বিষয়া ত্ৰিদিব কোঁৱৰক স্মাৰক পত্ৰ প্ৰদান কৰিছে মাজদিয়া-গৰেমাৰী গাঁও উন্নয়ন সমিতিয়ে । ইয়াৰ পাছতে চক্ৰ বিষয়া ত্ৰিদীৱ কোঁৱৰে মাজদিয়া গো-ৰিজাৰ্ভ পৰিদৰ্শন কৰে ।