বৰপেটা, 13 জুলাই : ৰাজ্যিক বিজেপিৰ সভাপতি তথা সৰভোগ সমষ্টিৰ বিধায়ক ৰণজিৎ কুমাৰ দাসৰ সমষ্টি ওদালগুৰিত বেকী নৈৰ প্ৰৱল গৰাখহনীয়াই ভয়াৱহ ৰূপ ধাৰণ কৰি অঞ্চলটোৰ মানচিত্ৰৰ প্ৰতি তীব্ৰ ভাবুকিৰ সৃষ্টি কৰিছে । প্ৰতিবছৰৰ দৰে এইবছৰো বেকী নৈয়ে নতুনকৈ সুঁতি সলোৱাত সমগ্ৰ এলেকাটোৰ ৰাইজে দুৰ্ভোগ ভুগিবলগীয়া হৈছে ।
বেকী নৈৰ গৰাখহনীয়া অঞ্চল পৰিদৰ্শন বিটিচি শাসক ৰাজেশ প্ৰসাদৰ
গৰাখহনীয়াৰ বাতৰি সংবাদ মাধ্যমত সবিস্তাৰে প্ৰচাৰ হোৱাৰ পিছত সোমবাৰে বাক্সাৰ ওদালগুৰিত বিটিচি শাসক ৰাজেশ প্ৰসাদে খহনীয়া অঞ্চল ভ্ৰমণ কৰি পৰিস্থিতিৰ বুজ লয় । সংবাদ মাধ্যমেৰে হোৱা বাৰ্তালাপত তেওঁ শীঘ্ৰেই খহনীয়া প্ৰতিৰোধৰ ব্যৱস্থা লোৱা হ’ব বুলি আশ্বাস প্ৰদান কৰাৰ লগতে তাৎক্ষণিকভাৱে জলসম্পদ বিভাগক গৰাখহনীয়া প্ৰতিৰোধৰ বাবে ব্যৱস্থা লোৱাৰ নিৰ্দেশ প্ৰদান কৰিব বুলি জানিবলৈ দিয়ে ।