বৰপেটাৰোড,13 ছেপ্তেম্বৰ:শনিবাৰে বৰপেটাৰ সৰভোগত মঞ্চ আৰু চলচিত্ৰ জগতৰ জনপ্ৰিয় অভিনেত্ৰী ৰীণা বৰাক প্ৰদান কৰা হয় 2020 বৰ্ষৰ শিল্পী সৈনিক ব্ৰজনাথ শৰ্মা বঁটা ৷ এই বঁটাত আছিল এখন চাদৰ, শৰাই, প্ৰশস্তি পত্ৰৰ লগতে গামোচা আৰু দুই লাখ টকাৰ চেক ৷ অসম চৰকাৰৰ সাংস্কৃতিক সঞ্চালকালয়ৰ উদ্যোগত আৰু বৰপেটা জিলা প্ৰশাসনৰ সহযোগত আয়োজিত এক গাম্ভীৰ্যপূৰ্ণ অনুষ্ঠানত অভিনেত্ৰীগৰাকীক এই বঁটা প্ৰদান কৰে মুখ্যমন্ত্ৰী সৰ্বানন্দ সোণোৱালে ৷ অসমৰ ভ্ৰাম্যমাণ জগতৰ লগতে চলচিত্ৰ জগতলৈ আগবঢ়োৱা অৱদানৰ বাবে ৰীণা বৰাক প্ৰদান কৰা হৈছে এই বঁটা ৷
বঁটা প্ৰদান অনুষ্ঠানত উপস্থিত থাকি মুখ্যমন্ত্ৰী সোণোৱালে শিল্পী সৈনিক ব্ৰজনাথ শৰ্মাক শ্ৰদ্ধাঞ্জলি জ্ঞাপন কৰি শিল্পীগৰাকীৰ আদৰ্শ গ্ৰহণ কৰিবলৈ নৱপ্ৰজন্মক আহ্বান জনায় ৷ লগতে শিল্পীগৰাকীৰ জীৱন বৃত্তান্ত দৃঢ়ভাৱে অধ্যয়ন কৰিবলৈও আহ্বান জনাই মুখ্যমন্ত্ৰীগৰাকীয়ে ৷ ইফালে কৰ’ণা মহামাৰীৰ বাবে ভ্ৰাম্যমান জগতত হোৱা ক্ষতি সম্পৰ্কে মুখ্যমন্ত্ৰীগৰাকীক অৱগত কৰি সকলো প্ৰকাৰৰ সহায়-সহযোগ বিচাৰে অনুষ্ঠানটোত উপস্থিত থকা বিশিষ্ট অভিনেতা মৃদুল ভূঞাৰ লগতে যতীন বৰা, আশা বৰদলৈ, সীমান্ত শেখৰ, বিদ্যাসাগৰ প্ৰমুখ্যে কেইবাগৰাকীও শিল্পীয়ে ৷ উক্ত অনুষ্ঠানতে গাঁওবুঢ়া সন্থায়ো মুখ্যমন্ত্ৰী সোণোৱালক সাক্ষাৎ কৰি দীৰ্ঘদিনীয়া দাবীসমূহ পূৰণ কৰিবলৈ আহ্বান জনায় ৷ মুখ্যমন্ত্ৰী সৰ্বানন্দ সোণোৱালে এই দাবীসমূহ শীঘ্ৰে পূৰণৰ প্ৰতিশ্ৰুতি প্ৰদান কৰে ৷