বৰপেটা,9 ছেপ্তেম্বৰ: ৰাজ্যৰ চুকে-কোণে অব্যাহত আছে ৰাজহুৱা বিতৰণ ব্যৱস্থাৰ চাউলৰ চোৰাং ব্যৱসায় ৷ বুধবাৰে বৰপেটাত এনে কাণ্ড সংঘটিত হোৱাৰ ঘটনা পোহৰলৈ আহিছে ৷ জিলাখনৰ মাজদিয়াত মঙলবাৰে নিশা এখন টাটা ম’বাইল বাহনসহ জব্দ কৰা হৈছে বৃহৎ পৰিমাণৰ চোৰাং চাউল ৷ ঘটনাৰ বিৱৰণী অনুসৰি, মাজদিয়া আৰক্ষীৰ নিয়মীয়া তালাচীত ধৰা পৰে ৰাজহুৱা বিতৰণ ব্যৱস্থাৰ নামত আৱণ্টিত প্ৰায় 58 বস্তা চোৰাং চাউল ৷ এএছ 25 ডিচি 3041 নম্বৰৰ এখন টাটা ম’বাইল বাহনে বৰপেটাৰ পৰা গুৱাহাটী অভিমুখে চাউলৰ বস্তা কঢ়িয়াই নি থকা অৱস্থাত আৰক্ষীয়ে জব্দ কৰে ৷
ৰাজহুৱা বিতৰণ ব্যৱস্থাৰ চাউল জব্দ
ইপিনে,আৰক্ষীয়ে বাহনখন জব্দ কৰে যদিও বাহনৰ চালকগৰাকীয়ে নিশাৰ আন্ধাৰৰ সুযোগ গ্ৰহণ কৰি পলায়ন কৰে বুলি আৰক্ষী সূত্ৰত প্ৰকাশ ৷ তদুপৰি,বুধবাৰে আৰক্ষীয়ে এই বিষয় সন্দৰ্ভত সংবাদ মাধ্যমৰ আগত কোনো তথ্য সদৰী কৰাৰ পৰা বিৰত থকা বিষয়টোৱে ৰহস্যৰ সৃষ্টি কৰিছে ৷