বৰপেটা, 20 জানুৱাৰীঃলোক কলা,সত্ৰীয়া সংস্কৃতিৰ লগতে যাত্ৰা নাট,ভাওনা আদি বিবিধ কৃষ্টি সংস্কৃতিৰ মেটমৰা সম্ভাৰেৰে ভৰপুৰ বৰপেটাৰ সংস্কৃতিৰ বৰঘৰ ৷ এসময়ত ব্যাপকভাৱে প্ৰচলিত বৰপেটাৰ যাত্ৰা নাটৰ গৌৰৱময় ইতিহাস সুঁৱৰি বৰপেটা সত্ৰৰ বৰখালত শনিবাৰৰ পৰা আৰম্ভ হৈছে যাত্ৰা নাট সমাৰোহ ৷
এই যাত্ৰা নাট সমাৰোহত শনিবাৰ আৰু দেওবাৰে নিশা মঞ্চস্থ কৰা হয় শকুনিৰ প্ৰতিশোধ,উমাতাৰা,দানবীৰ ৰজা হৰিশ্চন্দ্ৰ আৰু ৰক্ষকুমাৰ নামৰ নাট চাৰিখন ৷ যাত্ৰা নাটকৰ ক্ষেত্ৰত সম্প্ৰতি ম্লান পৰিছে বৰপেটাৰ পূৰ্বৰ গৰিমা ৷ সেয়েহে ইয়াৰ চৰ্চা অব্যাহত ৰখাৰ উদ্দেশ্যৰে,সামাজিক-সাংস্কৃতিক অনুষ্ঠান তাঁতীকুছিয়ে এইবেলি অনুষ্ঠিত কৰে এই যাত্ৰা নাট সমাৰোহ ৷ পূৰ্বতে বৰপেটা সত্ৰৰ বংশৰাসকলৰ দ্বাৰা যাত্ৰানাট পৰিৱেশন কৰা হৈছিল ৷ পূৰ্বৰ গৰিমা সুঁৱৰি সত্ৰৰ বংশৰাসকলৰ দ্বাৰা সত্ৰৰ তিথি উৎসৱ সমুহত যাত্ৰানাট পৰিৱেশনত গুৰুত্ব প্ৰদান কৰিব বুলি মন্তব্য কৰে বৰপেটা সত্ৰৰ বুঢ়াসত্ৰীয়া বশিষ্ঠ শৰ্মাই ৷