বৰপেটা, ১১ জানুৱাৰী : বৰপেটাৰ হাউলীত এগৰাকী যুৱতীৰ ন্যায় বিচাৰি হাহাকাৰ । ধেমাজীৰ যুৱতী তথা বৰপেটা আইন মহাবিদ্যালয়ৰ এগৰাকী ছাত্ৰীৰ এই হাহাকাৰ । বৰপেটাৰ হাউলী চহৰৰ সমীপৰ মিলনজ্যোতি মহাবিদ্যালয়ৰ হিন্দী বিভাগৰ প্ৰৱক্তা মাহবুব দৌলা আহমেদৰ সৈতে প্ৰেমৰ সম্পৰ্ক গঢ়ি উঠিছিল এই যুৱতী গৰাকীৰ । বিবাহপাশত আৱদ্ধ হোৱাৰ প্ৰতিশ্ৰুতি দি যুৱতী গৰাকীৰ সৈতে প্ৰেমৰ চলনাৰে শাৰিৰিক সম্পৰ্ক ৰক্ষা কৰিছিল প্ৰৱক্তাজনে । কিন্তু পৰৱৰ্তী সময়ত যুৱতী গৰাকী অন্তঃসত্তা হয় আৰু যুৱতী গৰাকীয়ে গৰ্ভপাত কৰিবলৈ বাধ্য হয় । যুৱতী গৰাকীৰ অভিযোগ অনুসৰি, প্ৰেমিক আৰু তেওঁৰ পৰিয়ালে নানা ধৰণৰ ভয় ভাবুকি প্ৰদান কৰি অন্ত:সত্বা কৰিবলৈ বাধ্য কৰিছিল যুৱতীগৰাকীক ৷ মাহবুবৰ নিজ ভাতৃৰ হাউলী চহৰত থকা দৌলা নামৰ ফাৰ্মাচীখনৰ জৰিয়তে গৰ্ভপাত কৰা হৈছিল বুলি অভিযোগ কৰিছে ভুক্তভোগী যুৱতীগৰাকীয়ে ।
ইফালে, এই সমগ্ৰ ঘটনা সংঘটিত হোৱাৰ পাছতে লম্পট যুৱক মাহবুব দৌলা আহমেদে কিছুদিন পূৰ্বে অন্য এগৰাকী যুৱতীৰ সৈতে লগত গোপনে বিবাহ পাশত আবদ্ধ হয় ৷ ইয়াৰ পিচতেই প্ৰেমিক মাহবুব দৌলা আহমেদৰ বিৰুদ্ধে ধেমাজিৰ ভুক্তভোগী যুৱতী গৰাকীয়ে কাষ চাপে আৰক্ষীৰ । ভুক্তভোগী যুৱতী গৰাকীয়ে এই সমগ্ৰ ঘটনা সন্দৰ্ভত ইতিমধ্যে হাউলী আৰক্ষী থানাত এখন এজাহাৰ দাখিল কৰিছে । উক্ত এজাহাৰৰ ভিত্তিত ভাৰতীয় দণ্ডবিধি আইনৰ 420/367/313/325/392/365/34 ধাৰাত হাউলী থানত 531/2020 নম্বৰত এটা গোচৰ ৰুজু কৰা হৈছে । কিন্তু আৰক্ষীয়ে বৰ্তমানলৈকে আটক কৰা নাই মাহবুব দৌলা আহমেদক । ইতিমধ্যে যুৱতী গৰাকীয়ে মাহবুবৰ ফটো সম্বলিত এক গোহাৰি প্ৰস্তুত কৰি ন্যায় বিচাৰিছে ।