বৰপেটা,11 জানুৱাৰী: কংগ্ৰেছৰ এজনৰ পিছত আন এজন বিধায়কৰ বিজেপিত যোগদান, কংগ্ৰেছ নেতা কৰ্মীৰ দলত্যাগ, দলীয় বিসম্বাদ ৷ বিগত সময়ত বিভিন্ন ধৰণৰ ৰাজনৈতিক পট পৰিৱৰ্তন ঘটা কংগ্ৰেছ দলে শেহতীয়াকৈ কংগ্ৰেছ-এআইইউডিএফৰ মিত্ৰতাক লৈ গ্ৰহণ কৰিছে বিপৰীত স্থিতি ৷ মূলতঃ নামনি অসমৰ সংখ্যালঘু ভোটৰ আশাত কংগ্ৰেছে এআইইউডিএফৰ সৈতে মিত্ৰতাক লৈ বহুদূৰ আগবাঢ়িছিল যদিও দলটোৰ এনে এআইইউডিএফ দৰদী স্থিতিক লৈ বিপৰীত মেৰুত অৱস্থান কৰিছে বৰপেটা জিলা কংগ্ৰেছে ৷ এআইইউডিএফৰ সৈতে কংগ্ৰেছৰ মিত্ৰতা মানি লোৱা নহ’ব বুলি দলৰ হাইকমাণ্ডক নিজ স্থিতিৰ কথা অৱগত কৰিছে বৰপেটা জিলা কংগ্ৰেছে ৷
বৰপেটা সমষ্টিৰ দাবালীয়াপাৰাত কংগ্ৰেছৰ এখন সভাত অংশগ্ৰহন কৰি বৰপেটা জিলা কংগ্ৰেছৰ সভাপতি শান্তনু শৰ্মাই মিত্ৰতা সন্দৰ্ভত প্ৰকাশ কৰিলে নিজৰ স্থিতি ৷ কংগ্ৰেছ নেতাগৰাকীৰ মতে, বৰপেটাত এআই ইউ ডি এফ বিগ জিৰ' ৷ তেনেক্ষেত্ৰত বৰপেটাত এ আই ইউ ডি এফৰ সৈতে মিত্ৰতা কৰাৰ কোনো কাৰণ নাই ৷ বৰপেটাত কংগ্ৰেছে অকলেই নিৰ্বাচন খেলিব বুলি দাবী কৰে কংগ্ৰেছ নেতাগৰাকীয়ে ৷ বৰপেটাত দলৰ সাংগঠনিক তৎপৰতা আৰম্ভ কৰাৰ লগতে বৰপেটাৰ প্ৰাক্তন বিধায়ক ৰহিম খানে সমষ্টিটোৰ চুকে কোনে আৰম্ভ কৰিছে সভা সমিতি ৷ এ আই ইউ ডি এফ ত্যাগ কৰি কংগ্ৰেছত যোগদান কৰা প্ৰাক্তন বিধায়ক ৰহিম খানেও কংগ্ৰেছে অকলেই নিৰ্বাচনত অৱতীৰ্ণ হোৱাৰ পক্ষত অৱস্থান কৰা দেখা গৈছে ৷