বৰপেটা,২৬জুনঃ প্ৰধানমন্ত্ৰী নৰেন্দ্ৰ মোদীৰ নেতৃত্বত সুৰক্ষিত নহয় দেশৰ সাৰ্বভৌমত্ব ৷ পাকিস্তান,নেপালৰ পিছতে চীনে লাডাখৰ গালোৱান উপত্যকাত ভাৰতৰ সীমান্তৰ ভিতৰলৈ সোমাই আহি ২০ জনকৈ জোৱানক হত্যা কৰাৰ ঘটনাক তীব্ৰভাবে সমালোচনা কৰিছে প্ৰদেশ কংগ্ৰেছৰ মুখপাত্ৰ তথা বৰপেটাৰ প্ৰাক্তন বিধায়ক আব্দুৰ ৰহিম খানে ৷
শুক্ৰবাৰে বৰপেটাৰ ৰাজীৱ ভৱনত এখন সংবাদমেল সম্বোধন কৰি কংগ্ৰেছ মুখপাত্ৰ গৰাকীয়ে চীনৰ আক্ৰমণক লৈ প্ৰধানমন্ত্ৰী আৰু প্ৰতিৰক্ষা মন্ত্ৰীৰ বক্তব্য পৰস্পৰ বিৰোধী বুলিও সমালোচনা কৰে ৷ নৰেন্দ্ৰ মোডীৰ শাসনত দেশৰ সীমা সুৰক্ষিত নহয় আৰু দেশৰ সাৰ্বভৌমত্বৰ প্ৰতি ভাবুকিৰ সৃষ্টি হোৱা বুলি মন্তব্য কৰি এই ঘটনাৰ বাবে প্ৰধানমন্ত্ৰীক ধিক্কাৰ জনায় আব্দুৰ ৰহিম খানে ৷ সংবাদমেলখনত বৰপেটা জিলাৰ কংগ্ৰেছৰ সভাপতি শান্তনু শৰ্মাই কেন্দ্ৰীয় চৰকাৰক ভাৰতৰ জনসাধাৰণ তথা ভাৰতৰ অখণ্ডতা ৰক্ষাৰ ক্ষেত্ৰত ব্যৰ্থ বুলি উল্লেখ কৰে ৷
