ৰাজ্যৰ বিশিষ্ট ব্যক্তিলৈ মুখ্যমন্ত্ৰীৰ বিহুৱান আৰু বিহুৰ শুভেচ্ছা প্ৰেৰণ

ৰঙালী মানেই যেন মৰম আৰু শ্ৰদ্ধা আদান-প্ৰদানৰ সময় । বিহুৱানে অন্য এক স্থান দখল কৰি আহিছে ৰঙালীৰ বতৰত । এইবাৰ বিহুৰ বতৰত মুখ্যমন্ত্ৰী হিমন্ত বিশ্ব শৰ্মাৰ বিশেষ পদক্ষেপ । ৰাজ্যৰ বিভিন্ন প্ৰান্তৰ বিশিষ্ট ব্য়ক্তিলৈ বিহুৱান প্ৰেৰণ কৰে মুখ্যমন্ত্ৰীগৰাকীয়ে (Assam CM sent Bihu greetings to state dignitaries)।

বৰপেটা,২৩ এপ্ৰিল: মুখ্যমন্ত্ৰী ড৹ হিমন্ত বিশ্ব শৰ্মাই ৰাজ্যখনলৈ বিশিষ্ট বৰঙণি আগবঢ়োৱা ব্যক্তি, শিল্পী-সাহিত্যিক, ক্ৰীড়াবিদ, শিক্ষাবিদ, সমাজসেৱক আদি বিভিন্নজনলৈ ৰঙালী বিহুৰ শুভেচ্ছা আৰু বিহুৱান প্ৰেৰণ কৰিছে (Assam CM sent Bihu greetings to state dignitaries) ৷ সমগ্ৰ ৰাজ্যখনৰ লগতে বৰপেটা জিলাৰ ১৩২ গৰাকী বিশিষ্ঠ ব্যক্তিলৈ মুখ্যমন্ত্ৰীয়ে আগবঢ়াইছে বিহুৱান আৰু শুভেচ্ছাবাণী (CM sent Bihu greetings) ৷

বিশিষ্ঠ সাহিত্যিক, কলাগুৰু বঁটাপ্ৰাপক অক্ষয় কুমাৰ মিশ্ৰ, সংগীতজ্ঞ সত্যকৃষ্ণ মিশ্ৰ আৰু লেখিকা নিৰুপমা মিশ্ৰক আজি তেওঁলোকৰ বাসগৃহলৈ গৈ বৰপেটাৰ জিলা উপায়ুক্ত তেজপ্ৰসাদ ভূচালে মুখ্যমন্ত্ৰীয়ে আগবঢ়োৱা বিহুৱান আৰু শুভেচ্ছাবাণী প্ৰদান কৰে ৷

জিলা উপায়ুক্তৰ পৰা মুখ্যমন্ত্ৰীয়ে প্ৰেৰণ কৰা বিহুৰ উপহাৰ ৰাইজৰ আশীৰ্বাদ হিচাপে গ্ৰহণ কৰি ৰাজ্যখনক সকলো দিশৰ পৰা আগবঢ়াই নিবলৈ মুখ্যমন্ত্ৰীৰ প্ৰতি আহ্বান জনাইছে বিশিষ্ট সাহিত্যিক অক্ষয় কুমাৰ মিশ্ৰই ৷ বিহুৰ এই উপহাৰৰ বাবে চৰকাৰক শুভেচ্ছা জনোৱাৰ লগতে হুঁচৰিৰ ভাষাৰেই ৰাইজৰ কুশল কামনা কৰে ৷

উল্লেখ্য যে, মুখ্যমন্ত্ৰীয়ে ৰাজ্যৰ বিশিষ্ট ব্যক্তিসকললৈ আগবঢ়োৱা বিহুৰ উপহাৰ জিলা উপায়ুক্তকে ধৰি জিলা প্ৰশাসনৰ বিষয়াসকলে বিশিষ্ট ব্যক্তিসকলৰ বাসগৃহলৈ গৈ প্ৰদান কৰিব ৷ মুখ্যমন্ত্ৰীৰ এই পদক্ষেপক প্ৰশংসাৰে ওপচাই তুলিছে বহুজনে ।

লগতে পঢ়ক:2024 ৰ ভিতৰত উত্তৰ-পূৱক দিল্লীৰ সৈতে ৰে’ল মানচিত্ৰত সংযোগৰ সম্ভাৱনা