কলগাছিয়াত অংগনবাড়ী কেন্দ্ৰত শিশু খাদ্য আত্মসাতৰ অভিযোগ

ৰূপসী শিশু উন্নয়ন প্ৰকল্পৰ চৰ বালাগাওঁ অংগনবাড়ী কেন্দ্ৰত বিভাগীয় কৰ্তৃপক্ষই ৬৭ দিনৰ খাদ্য সামগ্ৰীৰ টকা দিছিল যদিও ৰাইজক আন্ধাৰত ৰাখি নিৰীক্ষক ছুফীয়া খাতুনৰ নিৰ্দেশমতে জমেলা খাতুনে মাত্র ২৫ দিনৰ খাদ্য সামগ্ৰী বিতৰণ কৰি বাকী খাদ্য আত্মসাৎ কৰাৰ অভিযোগ উত্থাপন হৈছে ।

জনীয়া, 19 মে‘ : বৰপেটা জিলাৰ কলগাছিয়াত লক ডাউনৰ সময়ত ৩-৬ বছৰৰ শিশুক অংগনবাড়ী কেন্দ্ৰৰ কৰ্মীৰ জৰিয়তে বিতৰণ কৰিবলৈ দিয়া খাদ্য সামগ্ৰীৰ বিতৰণত ব্যাপক অনিয়ম সংঘটিত হোৱাৰ অভিযোগ উত্থাপন হৈছে ৷

একাংশ অংগনবাড়ী কৰ্মী আৰু নিৰীক্ষকে ৰাইজক অন্ধকাৰত ৰাখি খাদ্য খামগ্ৰী আত্মসাতৰ চেষ্টা চলোৱাৰ অভিযোগ উঠিছে । বৰপেটা জিলাৰ ৰূপসী শিশু উন্নয়ন প্ৰকল্পৰ ১৬২ নং চৰ বালাগাওঁ কেন্দ্ৰৰ কৰ্মী জমেলা খাতুনৰ বিৰুদ্ধে উত্থাপিত হৈছে এই অভিযোগ । উল্লেখ্য যে, এই কেন্দ্ৰত কৰ্তৃপক্ষই ৬৭ দিনৰ খাদ্য সামগ্ৰীৰ টকা দিছিল যদিও ৰাইজক আন্ধাৰত ৰাখি নিৰীক্ষক ছুফীয়া খাতুনৰ নিৰ্দেশমতে জমেলা খাতুনে মাত্র ২৫ দিনৰ ৩ কেজি চাউল, ৭০০ গ্ৰাম ডাউল, ৩০০ গ্ৰাম মিঠাতেল আৰু এক পেকেট নিমখ বিতৰণ কৰে বুলি ৰাইজে জানিবলৈ দিয়ে । আন আন কেন্দ্ৰ সমূহত ৬৭ দিনৰ খাদ্য সামগ্ৰী বিতৰণ কৰাৰ বিপৰীতে এই কেন্দ্ৰত কিয় ২৫ দিনৰ সামগ্ৰী বিতৰণ কৰা হল বুলি প্ৰশ্ন উত্থাপন কৰিছে স্থানীয় ৰাইজে ।

এই ক্ষেত্ৰত কেন্দ্ৰটোৰ কৰ্মী জমেলা খাতুনে নিৰীক্ষক ছুফীয়া খাতুনৰ সহযোগত এই কাণ্ড সংঘটিত কৰাৰ অভিযোগ তুলি বিভাগীয় কৰ্তৃপক্ষক তদন্ত কৰিৰ দোষীৰ বিৰুদ্ধে বিহীত ব্যৱস্থা গ্ৰহণৰ দাবী উত্থাপন কৰিছে ৰাইজে ।

লগতে পঢ়ক: মাছখোৱাস্থিত এলাহাবাদ বেংক খুলিবলৈ অনুমতি প্ৰদান জিলা উপায়ুক্তৰ