জনীয়া উপ-নিৰ্বাচনঃ কংগ্ৰেছৰ কলংকিত হাতৰ বিৰুদ্ধে মিছলীয়া আজমল !

ৰাজ্যত এতিয়া উপ-নিৰ্বাচনৰ গৰম বতাহ ৷ শুকুৰবাৰে বৰপেটাৰ জনীয়াত একেটা স্থানতে নিৰ্বাচনী প্ৰচাৰ চলালে কংগ্ৰেছ-এ আই ইউ ডি এফে ৷ নিৰ্বাচনী সভাত পৰস্পৰে পৰস্পৰৰ বিৰুদ্ধে ক্ষুৰধাৰ সমালোচনা কৰা দেখা গ'ল ৷

জনীয়া,18 অক্টোবৰঃৰাজ্যত এতিয়া উপ-নিৰ্বাচনৰ বতাহ ৷ তিনি সমষ্টিৰ উপ-নিৰ্বাচনৰ বাবে প্ৰত্যেকটো ৰাজনৈতিক দলে তীব্ৰ গতিত চলাইছে নিৰ্বাচনী প্ৰচাৰ ৷ শুকুৰবাৰে বৰপেটা জনীয়াত নিৰ্বাচনী প্ৰচাৰ চলালে এ আই ইউ ডি এফৰ সভাপতি মৌলনা বদৰুদ্দিন আজমলে ৷ আনহাতে একেটা স্থানতে কংগ্ৰেছ প্ৰাৰ্থী ছামচুল হকৰ হৈ প্ৰচাৰ চলালে ৰাজ্যৰ প্ৰাক্তন মন্ত্ৰী তথা কংগ্ৰেছৰ জ্যেষ্ঠ নেতা ৱাজেদ আলী চৌধৰীয়ে ৷ কংগ্ৰেছে আই ইউ ডি এফ দুয়োটা দলৰে নিৰ্বাচনী সভাত ইটোৱে সিটোক তীব্ৰ ভাষাৰে সমালোচনা কৰা দেখা গ'ল ৷ এ আই ইউ ডি এফৰ নিৰ্বাচনী সভাত উপস্থিত থাকি দলটোৰ সভাপতি মৌলনা বদৰুদ্দিন আজমলে কয় যে,কংগ্ৰেছৰ প্ৰাৰ্থী ছামচুল হক দেখাত ধুনীয়া কিন্তু এন আৰ চি সন্দৰ্ভত আজি পৰ্যন্ত উচ্চতম ন্যায়ালয়ৰ চৌহদ গৈ পাইছে নে নাই তাত সন্দেহ আছে ! সেয়ে জাতিৰ বাবে সদায়ে মাত মাতি অহা ডঃ হাফিজ ৰফিকুল ইছলামক ভোট দি জয়যুক্ত কৰাৰ আহ্বান জনাই এ আই ইউ ডি এফৰ সভাপতিগৰাকীয়ে ৷ একেখন সভাত উপস্থিত থাকি ধিং সমষ্টিৰ বিধায়ক আমিনুল ইছলামে ৰাইজক এন আৰ চিৰ স্বাৰ্থত এ আই ইউ ডি এফক ভোটদান কৰিবলৈ আহ্বান জনায় ৷ কংগ্ৰেছৰ হাত কলংকিত হাত,এই হাতক আল্লাৰ নামত বেকী নৈত পেলাই দিয়াৰো আহ্বান জনাই ধিঙৰ বিধায়ক গৰাকীয়ে৷

আনহাতে,একেটা স্থানতে অনুষ্ঠিত হোৱা কংগ্ৰেছৰ নিৰ্বাচনী সভাত এ আই ইউ ডি এফক তীব্ৰ ভাষাৰে সমালোচনা কৰে প্ৰাক্তন মন্ত্ৰী ৱাজেদ আলী চৌধুৰীয়ে ৷ তেখেতে কয় যে,এন আৰ চি সন্দৰ্ভত মিছা মাতিছে বদৰুদ্দিন আজমলে,তেখেত এজন মিছলীয়া ব্যক্তি ৷ জনীয়াৰ উন্নয়নৰ স্বাৰ্থত কংগ্ৰেছ প্ৰাৰ্থী ছামচুল হকক ভোটদান দিবলৈ আহ্বান জনাই কংগ্ৰেছ নেতাগৰাকীয়ে ৷