বৰপেটা, 11 অক্টোবৰঃ জনীয়া সমষ্টিত হ'বলগীয়া উপ-নিৰ্বাচনৰ বতাহ ক্ৰমাৎ গৰম হ'বলৈ আৰম্ভ কৰিছে । প্ৰতিটো দলৰ প্ৰাৰ্থীৰ হৈ নিৰ্বাচনী প্ৰচাৰ চলাবলৈ ভিৰ কৰিছে বিজেপি, কংগ্ৰেছ আৰু এ আই ইউ ডি এফৰ দলীয় ৰথী-মহাৰথী সকলে । শুকুৰবাৰে জনীয়াৰ লাংলাৰ সাপ্তাহিক বজাৰত বিজেপিৰ প্ৰাৰ্থী তৌফিকুৰ ৰহমানৰ নিৰ্বাচনী প্ৰচাৰ সভা অনুষ্ঠিত হৈ যোৱাৰ পিছত দিনৰ ১ বজাৰ পৰা আৰম্ভ হয় কংগ্ৰেছৰ প্ৰাৰ্থী ছামছুল হকৰ আন এখন নিৰ্বাচনী সভা । কংগ্ৰেছৰ প্ৰাৰ্থী ছামছুল হকৰ নিৰ্বাচনী প্ৰচাৰৰ বাবে জনীয়া সমষ্টিৰ লাংলাত উপস্থিত হয় অসম প্ৰদেশ কংগ্ৰেছৰ সভাপতি ৰিপুণ বৰা আৰু বৰপেটা লোক সভা সমষ্টিৰ সদ্য নিৰ্বাচিত সাংসদ আব্দুল খালেকে ।
ইফালে প্ৰদেশ কংগ্ৰেছৰ সভাপতি ৰিপুণ বৰাই ভাষণ প্ৰসংগত এ আই ইউ ডি এফ আৰু বিজপিক তীব্ৰ সমালোচনা কৰি কয় যে, জনীয়াত আজমলৰ দলৰ প্ৰাৰ্থীক সহায় কৰিবলৈহে বিজেপিয়ে তৌফিকুৰ ৰহমানক প্ৰাৰ্থী হিচাপে প্ৰক্ষেপ কৰিছে । তদুপৰি কংগ্ৰেছৰ প্ৰদেশ সভাপতিগৰাকীয়ে কয় যে, জনীয়াত বিজেপি প্ৰাৰ্থীজনৰ জয়ৰ কোনো সম্ভাৱনা নাই ৷ তেনেস্থলত এজন আমদানিকৃত গৰিয়া সম্প্ৰদায়ৰ মুছলমান নেতাক জয়ী হ'ব পৰা সমষ্টিত প্ৰাৰ্থীত্ব প্ৰদান নকৰি বিজেপিয়ে পুনৰ সম্প্ৰদায়টোক প্ৰতাৰণা কৰিলে ৷ সভাপতি বৰাই বিজেপিয়ে নিৰ্বাচনত পাঁচশ আৰু হেজাৰ টকাৰ উপঢৌকন দি ভোট লোৱাৰ অভিযোগ তুলি ৰাইজক তেনে ষড়যন্ত্ৰত ভৰি নিদি নিজৰ জাতি, ধৰ্ম আৰু পৰিয়ালক ৰক্ষা কৰাৰ আহ্বান জনোৱাৰ লগতে তৌফিকুৰ ৰহমানক জনীয়াত প্ৰাৰ্থীত্ব প্ৰদান কৰি বিজেপিয়ে ললী পপ খোৱাইছে বুলিও তাচ্ছিল্য কৰে ।