বৰপেটা,20 মে': বৰপেটা জিলাৰ ক'ভিড পৰিস্থিতিৰ বুজ লোৱাৰ উদ্দেশ্যে বুধবাৰে বৰপেটা মেডিকেল কলেজ হাস্পতালত উপস্থিত হ'ল সাংসদ আব্দুল খালেক আৰু দুই নৱ নিৰ্বাচিত বিধায়ক ৷ বৰপেটা মেডিকেল কলেজ হাস্পতালত উপস্থিত হৈয়ে হাস্পতালৰ অধ্যক্ষ ডাঃ ৰমেন তালুকদাৰ, অতিৰিক্ত উপায়ুক্ত আৰু স্বাস্থ্য বিভাগৰ বিষয়াসকলৰ সৈতে ক'ভিড পৰিস্থিতিক লৈ আলোচনাত মিলিত হয় সাংসদসহ বিধায়ক দুগৰাকী ৷
ক'ভিড নিয়ন্ত্ৰণৰ ক্ষেত্ৰত ৰাজনীতিৰ পক্ষপাতি নহয় আব্দুল খালেক
বিগত দিনত ক'ভিডত আক্ৰান্ত হৈ কেইবাজনো ৰাজনীতিকৰ মৃত্যু হোৱাৰ প্ৰসংগ উত্থাপন কৰি ৰাজ্যখনৰ লগতে বৰপেটা জিলাখনকো কেনেকৈ ক'ভিড মুক্ত কৰিব পাৰি, সেই কথাৰ গুৰুত্ব প্ৰদানৰ দিশসমূহ আলোচনা কৰে সাংসদ খালেকে ৷ বৰপেটাৰ সামগ্ৰিক ক'ভিড পৰিস্থিতি নিয়ন্ত্ৰণাধীন যদিও কিছু সমস্যা থকাৰ কথা উল্লেখ কৰি এইক্ষেত্ৰত মুখ্যমন্ত্ৰীয়ে ব্যৱস্থা গ্ৰহণৰ আশা প্ৰকাশ কৰে সাংসদ গৰাকীয়ে ৷