বৰপেটাৰোডৰ মহিলা নিৰ্যাতন কাণ্ডৰ অভিযুক্ত আৰক্ষীৰ শাস্তিৰ দাবীত আমছুৰ প্ৰতিবাদী কাৰ্যসূচী

বৰপেটাৰোডৰ নিচুকাত মহিলাক প্ৰহাৰ কৰা কাণ্ডত অভিযুক্ত কয়লাময়লা আৰক্ষী চকীৰ ভাৰপ্ৰাপ্ত আৰক্ষী বিষয়াৰ বিৰুদ্ধে আমছুৰ প্ৰতিবাদী কাৰ্যসূচী ৰূপায়ণ ৷ অভিযুক্ত আৰক্ষী বিষয়াগৰাকীক গ্ৰেপ্তাৰৰ দাবীত বিভিন্ন শ্লগানেৰে প্ৰতিবাদস্থলী উত্তাল কৰি তোলে শতাধিক আমছু কৰ্মীয়ে ৷

বৰপেটাৰোড, 21 ছেপ্টেম্বৰঃ সদৌ অসম সংখ্যালঘু ছাত্ৰ ইউনিয়নৰ বৰপেটা জিলা সমিতিৰ উদ্যোগত শনিবাৰে উত্তৰ বৰপেটাৰোডত অনুষ্ঠিত হয় এক প্ৰতিবাদী কাৰ্যসূচী ৷ উক্ত প্ৰতিবাদী কাৰ্যসূচীত সংগঠনটোৱে কিছুদিন পূৰ্বে বৰপেটাৰোডৰ নিচুকাত গৰ্ভৱতী মহিলাক চিৰাং জিলাৰ কয়লাময়লা আৰক্ষী চকীৰ ভাৰপ্ৰাপ্ত আৰক্ষী বিষয়া বিনোদ চৌধুৰীয়ে নিৰ্মমভাৱে প্ৰহাৰ কৰা ঘটনাৰ বিৰুদ্ধে বিক্ষোভ প্ৰদৰ্শন কৰে ৷ উল্লেখ্য যে আৰক্ষী বিষয়াগৰাকীৰ নিৰ্মম প্ৰহাৰত দুই মাহ ধৰি অন্তঃসত্বা মহিলাগৰাকীৰ দুৰ্ভাগ্যজনকভাৱে গৰ্ভপাত হৈছিল ৷ প্ৰতিবাদস্থলীত বৰপেটা জিলা আমছুৰ সভাপতি নজৰুল ইছলামে সমগ্ৰ ঘটনা সন্দৰ্ভত উদ্বেগ প্ৰকাশ কৰি কয় যে দেশৰ প্ৰধানমন্ত্ৰীয়ে "বেটি বচাও বেটি পঢ়াও" শ্লগান আওৰাই থকাৰ সময়তেই মহিলাৰ ওপৰত আৰক্ষীৰ এনেধৰণৰ আসুৰিকতা প্ৰদৰ্শন অতি নিন্দনীয় ৷ সভাপতিগৰাকীয়ে উচ্চ পৰ্যায়ৰ তদন্ত কৰি মহিলাগৰাকীৰ নিৰ্যাতন কাণ্ডত জড়িত দোষী আৰক্ষী বিষয়াগৰাকীৰ বিৰুদ্ধে কঠোৰতম শাস্তিৰ দাবী কৰাৰ লগতে নিৰ্যাতিত মহিলাগৰাকীক উপযুক্ত চিকিৎসা আৰু পৰিয়ালটোক উপযুক্ত ক্ষতিপূৰণ প্ৰদানৰো দাবী তোলে ৷ আনহাতে প্ৰতিবাদস্থলীত শতাধিক আমছু কৰ্মীয়ে আৰক্ষী তথা চৰকাৰৰ বিৰুদ্ধে বিভিন্ন শ্লগান প্ৰদানেৰে পৰিস্থিতি উত্তাল কৰি তোলে ৷