বহিৰাজ্যৰ পৰা অহা 49 গৰাকীক সৰুপেটা আৰু পাঠশালাত কোৱাৰেন্টাইন

বহিঃৰাজ্যৰ পৰা ৰেলযোগে আজি বিয়লিলৈকে বৰপেটা আহি পালে ৪৯ জন লোক ৷ সৰভোগ আৰু পাঠশালাত কোৱাৰেন্টাইন কৰা হয় এইসকল লোকক ৷

বৰপেটা, ১৫ মে: বহিঃৰাজ্যৰ পৰা ৰেলযোগে আজি বিয়লিলৈকে বৰপেটা আহি পালে ৪৯ জন লোক ৷ লোককেইজন আহি উপস্থিত হোৱাৰ পিচতে তেওঁলোকৰ স্বাস্থ্য পৰীক্ষাৰ লগতে কোভিড 19 পৰীক্ষাৰ বাবে নমুনা সংগ্ৰহ কৰা হয় ৷ শুক্ৰবাৰে আহি উপস্থিত হোৱা লোককেইজনক সৰভোগ আৰু পাঠশালাত কোৱাৰেন্টাইন কৰা হয় ৷

গুৱাহাটীৰ পৰা পাটাছাৰকুছিৰে জিলাখনত প্ৰৱেশ কৰা ৯ জন লোকক পাঠশালাৰ হোটেল অভিনন্দনত কোৱাৰেন্টাইন কৰা হৈছে । তেওঁলোকৰ মাজৰ ২জন দিল্লী, ৫ জন তামিলনাডু আৰু ২ জন পশ্চিম বংগৰ পৰা ৰেলেৰে আহি গুৱাহাটীত নামিছিল । ইফালে ৰেলযোগে আহি কোকৰাঝাৰ ষ্টেচনত নমা বৰপেটা জিলাৰ আন ৪০ জন যাত্ৰীক গাড়ীৰে আনি সৰভোগৰ বৰনগৰ মহাবিদ্যালয়ত কৰা হৈছে কোৱাৰেন্টাইন । ঝাৰখণ্ড, বিহাৰ, পশ্চিম বংগ আৰু হাৰিয়ানাৰ পৰা আহিছে এই লোকসকল ।

কোভিদ ১৯ পৰীক্ষাৰ বাবে ইতিমধ্যে প্ৰতিজন লোকৰে খেকাৰৰ নমুনা সংগ্ৰহ কৰিছে স্বাস্থ্য বিভাগৰ বিশেষ দলে ৷ বহিঃৰাজ্যৰ পৰা ৰেল যোগে বৰপেটালৈ আহিবলগীয়া লোকসকলক বৰপেটাৰ বৰনগৰ কলেজ, বৰনগৰ গাৰ্লছ হাইস্কুল, বৰপেটাৰোডৰ বিএইছ কলেজ, বৰপেটাৰ এম চি কলেজ প্ৰেক্ষাগৃহ, বৰপেটা আই আই টি আৰু তিতকাত অৱস্থিত মিনি আই আই টিৰ সৈতে ৬ টা স্থানত কৰা হ'ব কোৱাৰেন্টাইন ৷ ইয়াৰ উপৰিও যিসকল লোকে কোৱাৰেন্টাইন শিবিৰৰ পৰিৱৰ্তে হোটেলত থাকিব বিচাৰে তেওঁলোকৰ বাবে বৰপেটাৰ 18খন হোটেলত 400খন বিচনা সাজু কৰি ৰখা হৈছে ৷