বাক্সাৰ দুখন জৰাজীৰ্ণ প্ৰাথমিক বিদ্যালয়ৰ কাহিনী

এখন বিদ্যালয়ত ছাত্ৰ-ছাত্ৰীক শ্ৰেণী কোঠাৰ বাহিৰত বস্তাত বহুৱাই শিক্ষাদান দিয়াৰ বিপৰীতে আন খন বিদ্যালয়ত বৰষুণ আহিলেই স্তব্ধ হৈ পৰে পাঠদান ।

বাক্সা , 03 এপ্ৰিলঃবাক্সা জিলাৰ মুছলপুৰ প্ৰাথমিক শিক্ষাখণ্ডৰ দুখন প্ৰাথমিক বিদ্যালয় ৷ এই প্ৰাথমিক বিদ্যালয় দুখনে উদঙাইছে ৰাজ্যৰ শিক্ষা বিভাগৰ ফোপোলা স্বৰুপ ৷ এখন বিদ্যালয়ত ছাত্ৰ-ছাত্ৰীক শ্ৰেণী কোঠাৰ বাহিৰত বস্তাত বহুৱাই শিক্ষাদান কৰাৰ বিপৰীতে আনখন বিদ্যালয়ত বৰষুণ আহিলেই স্তব্ধ হৈ পৰে পাঠদান ।

এই বিদ্যালয় দুখন বাক্সা জিলাৰ জোপাদং প্ৰাথমিক বিদ্যালয় আৰু বিচাৰপুৰ আদিবাসী প্ৰাথমিক বিদ্যালয় ৷ 1982 চনত জোপাদং প্ৰাথমিক বিদ্যালয়খন স্থাপন কৰা হৈছিল ৷ বিদ্যালয়খনত মাত্ৰ 1টা শ্ৰেণীকোঠা হোৱাৰ বাবে ছাত্ৰ-ছাত্ৰী সকলে বিদ্যালয়ৰ বাৰাণ্ডাত বহি শিক্ষা গ্ৰহণ কৰিবলগীয়া হয় ৷ ইপিনে বিদ্যালয়খনত 51 জন ছাত্ৰ-ছাত্ৰীৰ বিপৰীতে নিযুক্ত হৈ আছে মাত্ৰ এজন শিক্ষক ৷ যাৰ ফলত এজন শিক্ষকে 6টা কৈ শ্ৰেণীৰ ছাত্ৰ-ছাত্ৰীৰ লগতে বিদ্যালয়খনৰ সম্পূৰ্ণ কাম কাজৰ দায়িত্ব ল'ব লগীয়া হয় ৷ আনফালে 1980 চনত স্থাপন কৰা হৈছিল বিচাৰপুৰ আদিবাসী প্ৰাথমিক বিদ্যালয় ৷ এই বিদ্যালয়খনত 42 জন ছাত্ৰ-ছাত্ৰীৰ বিপৰীতে নিযুক্ত হৈ আছে মাত্ৰ 3জন শিক্ষক ৷ অভিযোগ অনুসৰি বিদ্যালয়খন প্ৰাদেশীকৃত হোৱাৰ 6 বৰ্ষৰ পাচতো আজিকোপতি শিক্ষাবিভাগে বিদ্যালয়খনত 1টা পকী শ্ৰেণীকোঠা নিৰ্মাণ কৰিবলৈ সক্ষম নহ'ল ৷ ইপিনে ফুটা টিনপাতৰ তলতে ছাত্ৰ -ছাত্ৰীসকলে গ্ৰহণ কৰি আহিছে জীৱনৰ আদিপাঠ ৷ যাৰ ফলত বৰষুণ দিলেই স্তব্ধ হৈ পৰে শ্ৰেণীৰ পাঠদান ৷ আনহাতে বিদ্যালয়খনৰ প্ৰধান শিক্ষকৰ ভাষ্য অনুসৰি বাৰিষা কালত বিদ্যালয় চৌহদত এককাল পানী হোৱাৰ বাবে বন্ধ কৰিবলগীয়া হয় বিদ্যালয়খন ৷ এতিয়া পৰিৱৰ্তনৰ ঢোল বজাই ক্ষমতালৈ অহা বিজেপি চৰকাৰৰ শিক্ষা মন্ত্ৰী সিদ্ধাৰ্থ ভট্টচাৰ্যই এই সন্দৰ্ভত কি ব্যৱস্থা গ্ৰহণ কৰে সেয়া হে লক্ষণীয় হ'ব ৷