বাক্সা, 29 জানুৱাৰীঃ কৃষি-প্ৰযুক্তি ব্যৱস্থাপনা অভিকৰণ বাক্সাৰ অন্তৰ্গত কৃষি বিভাগৰ সৌজন্যত বুধবাৰৰ পৰা দুদিনীয়া কাৰ্য্যসূচীৰে আয়োজন কৰা হৈছে কৃষি মেলা ৷ কাৰ্যসূচী অনুসৰি পুৱাৰ ভাগত কৃষিমেলাৰ পতাকা উত্তোলন কৰে হস্ততাঁত আৰু বস্ত্ৰশিল্পৰ কাৰ্যনিৰ্বাহক সদস্য বিজিৎ গৌৰা নাৰ্জাৰীয়ে ৷ কৃষি মেলাৰ লগত সংগতি ৰাখি আয়োজিত প্ৰদৰ্শনীৰ দ্বাৰ উন্মোচন কৰে বিভাগটোৰ কাৰ্যবাহী সদস্য আনচুমা খুংগুৰ বড়োৱে ৷ লগতে মত বিনিময় অনুষ্ঠানৰ বন্তি প্ৰজ্বলন কৰে স্থানীয় বিধায়ক ইমানুৱেল মুছাহাৰীয়ে ৷
কৃষি মেলাখনত কৃষিজাত সামগ্ৰীৰ প্ৰদৰ্শনীৰ উপৰিও কৃষি বিজ্ঞান বিষয়ক বিভিন্ন বিষয়ৰ মত বিনিময়, ৰেচম, মীন পালন, পশুপালন আদি সন্দৰ্ভত আলোচনা চক্ৰৰো আয়োজন কৰা হয় ৷ উক্ত মেলাত এগৰাকী শিপিনীয়ে ভূটানৰ কাপোৰ বিক্ৰীৰে মাহেকত ১৫,০০০ টকা উপাৰ্জন কৰাৰ লগতে কেইবাগৰাকী মহিলাকো সংস্থাপন দিয়াৰ কথা সদৰী কৰে ।
কৰিমগঞ্জত কৃষিজাত সামগ্ৰীৰ প্ৰদৰ্শন কৰিমগঞ্জঃ দুদিনীয়া কাৰ্যসূচীৰে কৰিমগঞ্জতো আৰম্ভ হৈছে কৃষি মেলা ৷ জিলা প্ৰশাসন আৰু কৃষি বিভাগৰ উদ্যোগত আয়োজিত মেলাখনত উপলব্ধ হৈছে বিভিন্ন এছ এই জি আৰু থলুৱাভাৱে উৎপাদিত বিভিন্ন শাক-পাচলি ৷ ইয়াৰ বাহিৰেও উন্নত প্ৰজাতিৰ কুকুৰা, বতা চৰাই, হাঁহ, কাঠফুলা আদিৰো প্ৰদৰ্শনীৰ ব্যৱস্থা কৰা হয় ৷ সামগ্ৰীসমূহ প্ৰদৰ্শনীৰ সমান্তৰালকৈ বিক্ৰীৰো ব্যৱস্থা কৰা হৈছে ৷ বুধবাৰৰ দিনটোত কৃষি মেলাখনত উপস্থিত থাকে জিলা উপায়ুক্ত আম্বামুথান এম পি ৷ মেলাখনক লৈ স্থানীয় ৰাইজৰ উৎসাহ-উদ্দীপনাৰ অন্ত নোহোৱা হৈছে ৷
মৰিগাঁওঃ মৰিগাঁৱত জিলা কৃষি বিভাগৰ উদ্যোগত জাগীভকতগাঁৱত দুদিনীয়াকৈ অনুষ্ঠিত হোৱা কৃষিমেলাত কৃষি সামগ্ৰী প্ৰদৰ্শন কৰা হয় ৷ বুধবাৰে মেলাখন উদ্বোধন কৰে অসম চৰকাৰৰ ৰাজ্যিক মন্ত্ৰী পীযুষ হাজৰিকাই ৷ জাগীভকতগাঁৱৰ বিহুতলীত অনুষ্ঠিত হোৱা এই কাৰ্যসূচীত অংশগ্ৰহণ কৰি মন্ত্ৰীগৰাকীয়ে ৰাজ্যৰ কৃষকৰ মাজত গঠনমূলক প্ৰতিযোগিতা চলিছে বুলি মন্তব্য কৰে ৷ ইয়াৰ ফচলৰূপে এই প্ৰদৰ্শনীত কৃষকসকলে নিজ উৎপাদিত কৃষিজাত সামগ্ৰী প্ৰদৰ্শন কৰিবলৈ সক্ষম হৈছে । চৰকাৰৰ তৰফৰ পৰা বুজন সংখ্যক টেক্টৰ, পাৱাৰটিলাৰ যোগান ধৰা বুলি প্ৰকাশ কৰে মন্ত্ৰীগৰাকীয়ে ৷ নিজ ভাষণ প্ৰসংগত তথাকথিত ৰাজপথৰ আন্দোলনৰ পৰিৱৰ্তে এনে সেউজ আন্দোলন গঢ়ি তুলিবলৈ আহবান জনায় মন্ত্ৰী পীযুষে ৷
কৃষিজাত সামগ্ৰীৰ প্ৰদৰ্শন বুধবাৰৰ এই কাৰ্যসূচীত জিলা উপায়ুক্ত ঋতুৰাজ বৰা, মৰিগাঁও সমষ্টিৰ বিধায়ক ৰমাকান্ত দেউৰী আৰু জিলা কৃষি বিষয়া মধুৰাম পাতিৰকে প্ৰমুখ্যে কৰি বহুকেইজন বিশিষ্ট ব্যক্তি উপস্থিত থাকি মুকলি সভাত অংশ লয় । এই অনুষ্ঠানৰ পূৰ্বে বন্তি প্ৰজ্বলন আৰু স্মৃতি তৰ্পণ কৰাৰ লগতে স্থানীয় শংকৰদেৱ বিদ্যা নিকেতনৰ ছাত্ৰীৰ দ্বাৰা ভক্তিমূলক গীত পৰিৱেশন কৰি মন্ত্ৰীগৰাকীক আদৰণি জনোৱা হয় । মায়ং কৃষি চক্ৰৰ অন্তৰ্গত জাগীভকতগাঁৱত দুদিনীয়াকৈ অনুষ্ঠিত হোৱা কাৰ্যসূচীৰ আঁত ধৰে জ্যেষ্ঠ কৃষি বিষয়া দিব্যজ্যোতি হাজৰিকা আৰু অশোক শৰ্মাই ।
লগতে চাওকঃকেন্দ্ৰীয় চৰকাৰৰ বাজেটক লৈ কি আশা যুৱ প্ৰজন্মৰ !!!
