কুমাৰীকাটাত ওদালগুৰিৰ অসহায় বৃদ্ধ উদ্ধাৰ
কুমাৰীকাটা আৰক্ষী চকীৰ ভাৰপ্ৰাপ্ত আৰক্ষী বিষয়া বনজিৎ উজীৰ, তামুলপুৰ স্থানীয় সংবাদকৰ্মী ৰমেন দাস আৰু অভিজিৎ তালুকদাৰৰ সহযোগত বৃদ্ধ গৰাকীক উদ্ধাৰ কৰি কুমাৰীকাটা ৰাজ্যিক চিকিৎসালয়ত ভৰ্তি কৰোৱা হয়
বাক্সা,30 মে’: বাক্সা জিলাৰ কুমাৰীকাটা বজাৰত বৃহস্পতিবাৰে আবেলি এগৰাকী অসহায় বৃদ্ধক উদ্ধাৰ কৰে স্থানীয় ৰাইজে । জানিব পৰা মতে, পুৱাৰে পৰা এগৰাকী বৃদ্ধই এখন ব্যৱসায়িক প্ৰতিষ্ঠানৰ বাৰাণ্ডাত বহু সময় ধৰি বহি থকাত প্ৰতিষ্ঠানখনৰ গৰাকীৰ সন্দেহ হোৱাত সোধপোচ কৰাত বৃদ্ধ গৰাকীয়ে ওদালগুৰি জিলা সোনাৰীপাৰা গাঁৱৰ ৰঘুনাথ হৰিজন (৮০) বুলি জানিবলৈ দিয়ে । পিছত প্ৰতিষ্ঠানখনৰ গৰাকীয়ে বৃদ্ধগৰাকীৰ লগত থকা এটা বেগ পৰীক্ষা কৰোতে তেওঁৰ বস্ত্ৰ, ভোটাৰ কাৰ্ড, ওদালগুৰি শাখা ভাৰতীয় ষ্টেট বেঙ্ক একাউণ্ট, অটল অমৃত কাৰ্ড লাভ কৰি স্থানীয় লোক আৰু কুমাৰীকাটা আৰক্ষীক চকীত খবৰ দিয়ে । কুমাৰীকাটা আৰক্ষী চকীৰ ভাৰপ্ৰাপ্ত আৰক্ষী বিষয়া বনজিৎ উজীৰ, তামুলপুৰ স্থানীয় সংবাদকৰ্মী ৰমেন দাস আৰু অভিজিৎ তালুকদাৰৰ সহযোগত বৃদ্ধ গৰাকীক উদ্ধাৰ কৰি কুমাৰীকাটা ৰাজ্যিক চিকিৎসালয়ত ভৰ্তি কৰোৱা হয় । পিছত কুমাৰীকাটা আৰক্ষী চকীৰ ভাৰপ্ৰাপ্ত বিষয়া গৰাকীয়ে ওদালগুৰি জিলাৰ আৰক্ষীৰ লগত বৃদ্ধজনৰ প্ৰকৃত পৰিচয় উদ্ধাৰ কৰাৰ কাৰণে যোগাযোগ কৰে । উল্লেখ্য যে, তামুলপুৰ মহকুমাৰ কুমাৰীকাটালৈ কেনেদৰে বৃদ্ধগৰাকী আহিল এই বিষয়ে বৰ্তমানলৈকে জানিব পৰা হোৱা নাই ।