মুছলপুৰত চাঞ্চল্যকৰ হত্যাকাণ্ড

বাক্সাৰ মুছলপুৰত সংঘটিত চাঞ্চল্যকৰ হত্যাকাণ্ড ৷ ডেগাৰেৰে হানি-খুচি হত্যা বিজেপি কৰ্মী তথা ব্যৱসায়ী মিণ্টু কলিতাক ৷

বাক্সা,22 ডিচেম্বৰ:বিটিচি পৰিষদীয় নিৰ্বাচন সমাপ্ত হোৱাৰ 15 দিন সম্পূৰ্ণ নৌহওতেই বাক্সাৰ মুছলপুৰত এগৰাকী বিজেপি কৰ্মীক ডেগাৰেৰে হানি-খুচি হত্যা কৰে দুৰ্বৃত্তই ৷ এই হত্যাকাণ্ডৰ ঘটনাই সৃষ্টি কৰিছে চাঞ্চল্যৰ ৷

ব্যৱসায়ী মিণ্টু কলিতা

ঘটনাৰ বিৱৰণী অনুসৰি,বাক্সাৰ আনন্দপুৰ চি ব্লক গাঁৱৰ মিন্টু কলিতা নামৰ বিজেপি কৰ্মী তথা ব্যৱসায়ী গৰাকীক সোমবাৰে নিশা মুছলপুৰৰ পৰা নিজ গৃহলৈ স্কুটিৰে আহি থকা অৱস্থাত দুৰ্বৃত্তই আক্ৰমণ কৰে ৷ মুছলপুৰৰ সমীপৰ লামিদাৰাত সংঘটিত এই আক্ৰমণৰ ফলত ব্যৱসায়ীগৰাকীয়ে থিতাতে মৃত্যুবৰণ কৰে ৷ ব্যৱসায়ীগৰাকীৰ মূৰ আৰু পেটত দুৰ্বৃত্তই ডেগাৰেৰে আক্ৰমণ কৰি মৃতদেহটো হাবিৰ মাজত পেলাই থৈ যায় ৷

হত্যাৰ বলি বিজেপি কৰ্মী তথা ব্যৱসায়ী মিণ্টু কলিতা

মঙলবাৰে পুৱা স্থানীয় লোকে মৃতদেহটো প্ৰত্যক্ষ কৰি আৰক্ষীক খবৰ দিয়াত ঘটনাস্থলীত বাক্সা আৰক্ষী উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে মুছলপুৰ অসামৰিক চিকিৎসালয়লৈ প্ৰেৰণ কৰে ৷ কোনে কি কাৰণে ব্যৱসায়ীগৰাকীক হত্যা কৰিলে সেয়া এই মুহুৰ্তলৈকে পোহৰলৈ অহা নাই ৷ ঘটনা সন্দৰ্ভত বাক্সা আৰক্ষীয়ে অনুসন্ধান অব্যাহত ৰাখিছে ৷

লগতে চাওকঃনামেৰী ৰাষ্ট্ৰীয় উদ্যানৰ প্ৰাকৃতিক সৌন্দৰ্যই আকৰ্ষণ কৰিছে বনভোজৰ দলক