বাক্সা,18 মে’: ৰাজ্য চৰকাৰৰ শেহতীয়া জিলা উপায়ুক্তৰ ৰদ-বদলত বাক্সা জিলাৰ উপায়ুক্ত ৰঞ্জন শৰ্মাকো বদলি কৰা হয় ৷ সেই হেতুকে সোমবাৰে উপায়ুক্তগৰাকীক বাক্সাৰ পৰা বিদায় সম্ভাষণ জনাই জিলাখনৰ কেইবাটাও সাংবাদিক সন্থাই ৷
উল্লেখ্য যে, 2019 চনৰ 13 নৱেম্বৰত বাক্সা জিলাৰ উপায়ুক্ত হিচাপে যোগদান কৰিছিল ৰঞ্জন শৰ্মাই । যোগদান কালৰে পৰা জিলাখনৰ উন্নয়নমূলক কামৰ তদাৰক কৰিবলৈ লোৱাৰ সময়তে ক’ভিড মহামাৰীৰ প্ৰাদুৰ্ভাৱ পৰে । তেতিয়াৰ পৰাই উপায়ুক্তগৰাকীয়ে জিলাখনৰ কৰ’ণাত আক্ৰান্ত অঞ্চলসমূহ তদাৰক কৰি কৰ’ণাৰ সজাগতাক লৈ ব্যৱস্থা গ্ৰহণ কৰে ।
পৰৱৰ্তী সময়ত বিটিআৰত ৰাজ্যপালৰ শাসন জাৰি হোৱাৰ সময়তো গুৰুত্বপূৰ্ণ ভূমিকা গ্ৰহণ কৰে উপায়ুক্ত শৰ্মাই । ইয়াৰ পাচত অনুষ্ঠিত বিটিচি নিৰ্বাচন আৰু বিধানসভা নিৰ্বাচনো সুকলমে সম্পন্ন কৰিবলৈ সক্ষম হয় উপায়ুক্ত গৰাকীয়ে । জিলা উপায়ুক্তৰ কাৰ্যালয়ত উপায়ুক্ত গৰাকীক বিদায় সম্ভাষণ জনাবলৈ অহা সাংবাদিকৰ আগত নিজৰ অভিমত ব্যক্ত কৰি জনতাৰ হৃদয়ৰ উপায়ুক্ত ৰঞ্জন শৰ্মাই বাক্সা জিলাত কাম কৰি এক নতুন অভিজ্ঞতা লাভ কৰা বুলি মন্তব্য কৰে ।