বাক্সা, 1 মাৰ্চ:বিটিচি পৰিষদত মিত্ৰতাৰে পৰিষদ গঠন কৰাৰ পাছত এইবাৰ পুনৰ অসম বিধানসভা নিৰ্বাচনত ঐক্যবদ্ধভাৱে অংশ ল'ব বিজেপি, ইউপিপিএল আৰু জিএছপিয়ে ৷ আগন্তুক অসম বিধানসভা নিৰ্বাচনত আসন বুজাবুজিৰ মাজেৰে নিৰ্বাচনত অংশ লোৱাৰ সিদ্ধান্ত লৈছে বিজেপি, ইউপিপিএল আৰু জিএছপিয়ে ৷ বিপিএফক বিদায় দিয়াৰ বাবে পুনৰ একত্ৰিত হৈছে তিনিওটা ৰাজনৈতিক দল ৷
বিপিএফক উৎখাত কৰাৰ বাবে আসন বুজাবুজিৰ সিদ্ধান্ত তিনিওটা দলৰ
সোমবাৰে বাক্সাত তিনিওটা দলে এখন যৌথ সভা অনুষ্ঠিত কৰে ৷ বাক্সা জিলাৰ 63 নং ছাপাগুৰি বিধানসভা সমষ্টিৰ অন্তৰ্গত নাৰায়ণপুৰত এই যৌথ সভা খন অনুষ্ঠিত হয় ৷ জিএছপি দলৰ সভাপতি তথা সাংসদ নৱ কুমাৰ শৰণীয়া, বিজেপি দলৰ বাক্সা জিলা সমিতিৰ সভাপতি ৰাম দাহাল আৰু বিটিচি পৰিষদৰ কাৰ্যবাহী সদস্য ৰাকেশ ব্ৰহ্মৰ উপস্থিতিত প্ৰায় পাঁচ শতাধিক দলীয় কৰ্মীয়ে এই সভাত অংশ লয় ৷