মানাহ ৰাষ্ট্ৰীয় উদ্যানত চলি থকা কাঠৰ চোৰাং বেহাৰ তদন্ত ঘোষণা

মানাহ ৰাষ্ট্ৰীয় উদ্যান আৰু ব্যাঘ্ৰ প্ৰকল্পত অবাধে চলি থকা বনধ্বংস তথা কাঠৰ অবৈধ সৰবৰাহ সন্দৰ্ভ তদন্ত ঘোষণা পৰিবেশ আৰু বন বিভাগৰ ৷ তদন্তকাৰী বিষয়া তথা অতিৰিক্ত সচিব দেৱ কলিতাক এই ঘটনাৰ তদন্ত কৰি প্ৰতিবেদন দাখিলৰ দায়িত্ব অৰ্পন কৰিছে বিভাগে ৷

নিউজ ডেস্ক, 25 আগষ্ট :বনমন্ত্ৰী পৰিমল শুক্লবৈদ্যই মানাহ ৰাষ্ট্ৰীয় উদ্যান আৰু ব্যাঘ্ৰ প্ৰকল্পৰ বাঁশবাৰী খণ্ডত চলি থকা বন ধ্বংস আৰু নদীৰ বুকুৱেদি অবৈধভাৱে কাঠ সৰবৰাহৰ বিষয়টোৰ অনুসন্ধান কৰিবলৈ নিৰ্দেশ প্ৰদান কৰিছে বন বিভাগক ৷ বনবিভাগৰ সচিব এম. বৰুৱা সেনে শনিবাৰে এই সন্দৰ্ভত এক নিৰ্দেশনা প্ৰেৰণ কৰি দেব কলিতাক অনুসন্ধানৰ দায়িত্ব অৰ্পন কৰিছে ৷

এই অবৈধ কাৰ্য-কলাপ চলি থকা বন খণ্ডটোৰ দায়িত্বত থকা বিষয়াসকলৰ নাম নিৰ্দিষ্ট কৰাৰ লগতে সমগ্ৰ বিষয় সন্দৰ্ভত প্ৰতিবেদন দাখিল কৰিবলৈ নিৰ্দেশ দিয়া হৈছে বিষয়াগৰাকীক ৷ তাৰোপৰি প্ৰয়োজনত বিহীত ব্যৱস্থা গ্ৰহণৰ বাবেও উল্লেখ কৰা হৈছে এই নিৰ্দেশনাত ৷

উল্লেখ্য যে, একাংশ বন মাফিয়াই দীৰ্ঘ দিন ধৰি বাঁশবাৰী বন খণ্ডত অবাধে মূল্যৱান গছ কাটি সেই সমূহ সৰবৰাহ কৰি আহিছে নদীৰ বুকুৰে ৷ কিন্তু ৰহস্যজনক কাৰণত ইমান দিনে ইয়াৰ বিপক্ষে লোৱা হোৱা নাছিল কোনো ব্যৱস্থা ৷

এতিয়া খোদ বনমন্ত্ৰীয়ে এই সমগ্ৰ বিষয়ৰ তদন্তৰ বাবে নিয়োগ কৰিছে বিষয়া ৷ অনুসন্ধানৰ অন্ততহে জানিব পৰা যাব, কাৰ আশীৰ্বাদত বন মাফিয়াই এইদৰে অবাধে চলাই আছিল কাঠৰ চোৰাং বেহা ৷

লগতে পঢ়কঃ অসম-মেঘালয় সীমান্তৰ উমলাফেৰত উত্তেজনাময় পৰিস্থিতি