বৰমা, ১৪ অক্টোবৰ :আত্মীয়ক জীৱন দান দিবলৈ গৈ এতিয়া দিশহাৰা এগৰাকী যুৱক ৷ নিজৰ মৃত্যুমুখী শালপতিক এটা কিডনী দান দি এতিয়া নিজে তিল তিলকৈ আগবাঢ়িছে মৃত্যু মুখলৈ ৷ প্ৰতিশ্ৰুতি দিও এতিয়া শালপতিয়ে খবৰ নলয় যুৱকজনৰ ৷ বাক্সা জিলাৰ মুছলপুৰ আৰক্ষী থানাৰ অন্তৰ্গত থমনাৰ ৰায়পুৰৰ এই গৰাকী যুৱক নাম হেমন্ত ৰয় ৷ ২০১৪ চনৰ ফেব্ৰুৱাৰী মাহত এইগৰাকী হেমন্ত ৰয়ে নিজৰ শালপতিক দান কৰিছিল এটা কিডনী ৷ হোজাই জিলাৰ লামডিংৰ বাসিন্দা তথা ৰেল বিভাগৰ কৰ্মচাৰী ৰতনলাল মজুমদাৰে প্ৰতিশ্ৰুতি দিছিল হেমন্ত ৰয়ক ৷ প্ৰথম অৱস্থাত চিকিৎসাৰ নামত একলাখ টকা দি পৰৱৰ্তী সময়ত পৰিয়ালটোক সহায় কৰিব ৷ সেই প্ৰতিশ্ৰুতি অনুসৰি দুই সন্তানৰ পিতৃ হেমন্ত ৰয়ে শালপতি ৰতনলাল মজুমদাৰক প্ৰদান কৰিছিল নিজৰ এটা কিডনী ৷
পিচে সেইগৰাকী শালপতি ৰতনলালে পাহৰিলে হেমন্তক দিয়া প্ৰতিশ্ৰুতি ৷ দিনে দিনে দুৰ্বল হৈ পৰা হেমন্তৰ কোনো খবৰ নলয় ৰতনলালে ৷ ফোন কৰিলেও দিয়ে দাবী ধমকি ৷ দিন হাজিৰা কৰি জীৱন নিৰ্বাহ কৰা হেমন্ত এতিয়া দিশহাৰা ৷ পত্নী আৰু দুই সন্তানক লৈ এতিয়া চিন্তিত ৷ দুৰ্বল হোৱা বাবে এতিয়া গাঁৱৰ মানুহেও নামাতে কাম কৰিবলৈ ৷ আনৰ জীৱন বচাবলৈ গৈ এতিয়া নিজেই মৃত্যুমুখী এইগৰাকী যুৱক ৷