ৰৌতা, ৪ অক্টোবৰ :উপ-নিৰ্বাচনৰ প্ৰাক মূহুৰ্তত বিটিচিৰ ৰাজনৈতিক বতাহ আকৌ গৰম হোৱাৰ দিশে । বিজেপিৰে বিপিএফৰ মিত্ৰতা চূড়ান্ত হোৱাৰ কথা ঘোষণা হাগ্ৰামা মহিলাৰীৰ । মাত্ৰ আনুষ্ঠানিকতাহে বাকী বুলি মন্তব্য মহিলাৰীৰ । বিপিএফ আকৌ বিজেপিৰ কাষ চপাৰ লগে লগেই অধিক আকৰ্ষণীয় হৈ পৰিছে বিটিচিৰ ৰাজনীতি । ইয়াৰ সমান্তৰালভাৱে প্ৰশ্ন উঠিছে যে, পুনৰ বিটিচি প্ৰধানৰ আসন দখল কৰিব নেকি হাগ্ৰামা মহিলাৰীয়ে ? কি হ'ব বিটিআৰ প্ৰধান প্ৰমোদ বড়োৰ ?
লগতে পঢ়ক :ফ্লেট ক্ৰয় কৰোঁতা-নিৰ্মাতাৰ চুক্তি সন্দৰ্ভত কেন্দ্ৰলৈ জাননী উচ্চতম ন্যায়ালয়ৰ
মুখ্যমন্ত্ৰী হিমন্ত বিশ্ব শৰ্মাৰ লগত বিপিএফ নেতৃত্বৰে হোৱা আলোচনাত মিত্ৰতাই চূড়ান্ত ৰূপ পোৱাৰ পিছতে ওদালগুৰি জিলাৰ ৰৌতাস্থিত B.I.C.C প্ৰেক্ষাগৃহত বিপিএফৰ কেন্দ্ৰীয় কাৰ্যনিৰ্বাহক সভা অনুষ্ঠিত হয় । সভাখনত বিপিএফ প্ৰধান হাগ্ৰামা মহিলাৰীকে ধৰি দলীয় বিধায়ক আৰু শীৰ্ষ নেতৃত্বৰ উপস্থিতিত অনুষ্ঠিত হয় উক্ত সভাখন ৷
সভাত বিজেপিৰে হোৱা মিত্ৰতা আৰু আগন্তুক উপ-নিৰ্বাচন সন্দৰ্ভত আলোচনা হয় বুলি মহিলাৰীয়ে সাংবাদিকৰ আগত মন্তব্য কৰে । আগন্তুক উপ-নিৰ্বাচনৰ বাবে গোঁসাইগাঁও সমষ্টিৰ বাবে বিপিএফৰ ধ্ৰুৱ কুমাৰ ব্ৰহ্ম নাৰ্জাৰীৰ নাম প্ৰাৰ্থী হিচাপে ঘোষণা কৰে ৷