বাক্সা,11 মে’:বিজ্ঞান আৰু প্ৰযুক্তিবিদ্যাৰ উত্থানৰ পিছতো উন্নত নহ’ল ৰাজ্যৰ কৃষি ব্যৱস্থা ৷ কৃষি কাৰ্যৰ বাবে ন্যুনতম সা-সুবিধাখিনি ৰাজ্যত উপলব্ধ নোহোৱাত পৰম্পৰাগত কৃষি পদ্ধতিতে নিৰ্ভৰ কৰিবলগীয়া হৈছে কৃষকসকলে ৷ একে সমস্যাৰ সন্মুখীন হৈছে বাক্সা জিলাৰ তামুলপুৰ মহকুমাৰ অন্তৰ্গত বৃহত্তৰ নাগ্ৰীজুলি অঞ্চলৰ কৃষকসকল ৷ ইয়াৰ পৰিণতিস্বৰূপে কৃষি কৰ্মত আগুৱাব পৰা নাই স্থানীয় কৃষকসকল ৷ ফলত উদং হৈ পৰি ৰৈছে অঞ্চলটোৰ শ শ বিঘা কৃষি ভূমি । বিশেষকৈ নাগ্ৰীজুলিৰ সমীপৰ অধিকাংশ গাঁৱতে নাই জলসিঞ্চনৰ ব্যৱস্থা ৷ বৰষুণৰ ওপৰত নিৰ্ভৰশীল অঞ্চলটোৰ কৃষকসকলে অতি সাধাৰণভাৱে জীৱন নিৰ্বাহ কৰিবলগীয়া হৈছে ৷ চৰকাৰে কৃষি ভূমিত পানী যোগানৰ উদ্দেশ্যে জলসিঞ্চন ব্যৱস্থাৰ অধীনত বিভিন্ন আঁচনি গ্ৰহণ কৰিছে যদিও বিভাগীয় বিষয়া-কৰ্মচাৰীৰ অকৰ্মণ্যতাৰ বাবে সঠিকভাৱে ৰূপায়ণ হোৱা নাই কোনো ব্যৱস্থা ৷
ইপিনে, পৰম্পৰাগত কৃষি পদ্ধতিৰে খেতি কৰি লাভৱান হোৱাৰ বিপৰীতে লোকচানৰহে সন্মুখীন হৈছে কৃষকসকল । নিকটৱৰ্তী হাট-বজাৰ সপ্তাহ বা মাহৰ মুৰত দেখা এইসকল কৃষকৰ বাবে মহকুমা সদৰস্থিত কৃষি বিভাগৰ কাৰ্যালয়লৈ গৈ আবেদন-নিবেদন কৰাটো এক জটিল বিষয় । যাৰ বাবে প্ৰকৃত হিতাধিকাৰী বা কৃষকক ঢুকি নাপায় বিভাগটোৰ আঁচনিয়ে । বিগত কিছুদিন পূৰ্বে চৰকাৰে 5,00,000 টকা পৰ্যন্ত ৰেহাই প্ৰদানেৰে ট্ৰেক্টৰ প্ৰদানৰ যি আঁচনি ৰূপায়ণ কৰিলে, ইয়াৰ দ্বাৰা উপকৃত হ'ব পৰা নাই সাধাৰণ কৃষকসকল । সম্প্ৰতি পঞ্জাৱত উপলব্ধ তথা ৰাজা এণ্টাৰপ্ৰাইজকে ধৰি অন্যান্য কোম্পানীৰ দ্বাৰা নিৰ্মিত 40-50 হাজাৰ টকীয়া বিভিন্ন সুবিধা থকা ৰুটাভেটৰ ৱিডাৰ মেচিন ক্ৰয় কৰি কৃষকসকলক বিনামূলীয়াকৈ বিতৰণ কৰিলে চৰকাৰী আঁচনিখন সাৰ্থক হোৱাৰ সম্ভাৱনা আছিল ৷