বাক্সা, ১৯ ডিচেম্বৰ: বড়োলেণ্ড আন্দোলনৰ সময়ত বহু সংগঠনৰ লগতে সাধাৰণ জনতা বড়োভূমিৰ স্বাৰ্থত ৰাজপথলৈ ওলাই আহিছিল । আন্দোলনত অংশ লৈ প্ৰাণ হেৰুৱাবলগীয়া হৈছিল বহুজনে । মাতৃভূমিৰ বাবে আন্দোলনত জপিয়াই পৰা কৰ্মীসকল আজি উপেক্ষিত হৈ আছে । শনিবাৰে বড়োলেণ্ড মুভমেণ্ট এক্স ৱৰ্কাৰ এছ'চিয়েচনে এক সংবাদমেল সম্বোধন কৰি বিটিচি প্ৰশাসনৰ দ্বাৰা ইমানদিনে অৱহেলিত হৈ অহাৰ কথা প্ৰকাশ কৰে ।
মুছলপুৰৰ নাৰায়ণপুৰত সম্বোধন কৰা সংবাদমেলত সংস্থাটোৰ নেতৃত্বই আক্ষেপ কৰি কয় যে, পৃথক বড়োভূমি বিচাৰি প্ৰতিবাদ কৰাৰ সময়ত প্ৰাণ হেৰুওৱা সাহসী যুদ্ধাৰ পৰিয়ালে আজি পৰ্যন্ত সাহায্য লাভ কৰা নাই । বিগত ১৭ বছৰে শাসনৰ গাদীত থকা হাগ্ৰামা মহিলাৰী চৰকাৰৰ এইসকল পৰিয়ালৰ কথা ভাৱি চোৱাৰ আহৰি নহ'ল । সেয়ে, ক্ষোভিত হৈ পৰিছে সংস্থাটোৰ নেতা-কৰ্মীসকল । আজি তেওঁলোকে প্ৰমোদ বড়োক অভিনন্দন জনোৱাৰ লগতে বড়োভূমিৰ আন্দোলনত অৱদান আগবঢ়োৱা প্ৰাক্তন কৰ্মীসকলৰ পুনৰ সংস্থাপনৰ দাবী জনায় ।
আজিৰ সংবাদমেলত উপস্থিত থাকে সংস্থাটোৰ সভাপতি সুভাষ বসুমতাৰী, কাৰ্যকৰী উপ-সভাপতি গজেন হায়নাৰীৰ লগতে কোকৰাঝাৰ, চিৰাং, বাক্সা আৰু ওদালগুৰিৰ বহুকেইগৰাকী সদস্য । নতুন পৰিষদে তেওঁলোকৰ দাবী পূৰণ কৰিব বুলি আশাবাদী সংস্থাটোৰ নেতৃত্ব ।
লগতে পঢ়ক:দুখনকৈ ব্যক্তিগত বিদ্যালয়ত অগ্নিসংযোগ দুৰ্বৃত্তৰ
